O‘zbekistonda Ishbilarmonlik faolligi indeksi (IFI) 2022-yil dekabr oyida 1054 birlikni tashkil etib, noyabr oyiga nisbatan 5,4 foizga oshgan. Bu haqda “Daryo”ga Iqtisodiy tadqiqotlar va islohotlar markazi xabar berdi.
Shuningdek, ishbilarmonlik faolligi indeksi o‘tgan yilning mos davriga nisbatan esa 3,3 foizli o‘sish qayd etildi.
2022-yilning dekabr oyida Ishbilarmonlik faolligi indeksi o‘tgan oyga nisbatan 5,4 foizga oshib, 1054 birlikni tashkil etishi, quyidagi komponentlar darajasidagi o‘zgarishlarga bog‘liq bo‘lgan:
- korxonalarning bank hisobvaraqalaridagi operatsiyalar soni 4,9 foizga oshgan;
- faoliyat ko‘rsatayotgan korxonalar bo‘yicha komponent 0,5 foizga oshgan;
- Tovar-xom ashyo birjasida xom ashyo sotib olish jadalligi 6,7 foizga oshgan;
- tovar belgilari bo‘yicha komponent 27,6 foizga oshgan.
Hududlar kesimida Sirdaryo viloyatida eng yuqori o‘sish sur’ati qayd etilgan.
2022-yil dekabr oyida Ishbilarmonlik faolligi indeksi 7 ta hududda o‘tgan oyga (2022-yil noyabr) nisbatan o‘sgan.
Sirdaryo (43,9 foiz), Surxondaryo (35,9 foiz), Andijon (28,8 foiz), Buxoro (19,9 foiz) viloyatlari va Toshkent shahrida (22,7 foiz) sezilarli darajada o‘sish kuzatilgan.
Shu bilan birga ushbu ko‘rsatkich 2 ta hududda kamaygan. Xususan, Jizzax (-17,9 foiz) va Xorazm (-1,8 foiz) viloyatlarida o‘tgan oyga nisbatan kamayish kuzatilgan.
Izoh (0)