“Daryo” nashrining “Kun tenderlari” rukni ostida 27-yanvar kuni e’lon qilgan maqolasida bir qator shubhali tender savdolari haqida ma’lumot berilgandi. Korrupsiyaga qarshi kurashish agentligi materialga munosabat bildirib, noqonuniy holatlar yuzasidan chora ko‘rilganini ma’lum qildi.
Jumladan, “Namangandonmahsulotlari” AJ buyurtmachiligida 224608-sonli lot bo‘yicha o‘tkazilgan 200 million so‘mlik davlat xaridida “Davlat xaridlari to‘g‘risida”gi qonunning 10, 14, 23 va 42-moddalari hamda “Raqobat to‘g‘risida”gi qonun talablari buzilgan. Xaridda ishtirok etgan “T.A.”, “A.L.” va “S.A.” MCHJlarning rahbari bir shaxs bo‘lgani holati yaqqol ko‘rinib turgan bo‘lsa-da, xarid komissiyasi tomonidan ushbu ishtirokchilarni chetlatish choralari ko‘rilmagan.
Shuningdek, “Toshkent issiqlik markazi” unitar korxonasi buyurtmachiligida 222662-sonli lot bilan elektr dvigatellarni kapital ta’mirlash uchun o‘tkazilgan 2,4 milliard so‘mlik davlat xaridida ishtirok etgan 3 ta subyektdan 2 tasi, jumladan, Toshkent shahridagi “M.” va “E.S” MCHJlarning ta’sischisi ham bir shaxsga tegishli ekani aniqlangan. Holat yuzasidan esa xarid komissiyasi tomonidan ularni chetlatish choralari ko‘rilmagan.
Chust tuman Tibbiyot birlashmasi buyurtmachiligida 222920-sonli lot bo‘yicha 57,5 million so‘mlik tibbiyot tarozisini sotib olish uchun o‘tkazilgan davlat xaridida ham Namangan shahridagi rahbari va ta’sischisi aynan bir shaxs bo‘lgan “B.M.” va “G” MCHJlar ishtirok etib, qonunbuzilishlarga yo‘l qo‘yilgan.
Jizzax viloyat teri-tanosil kasalliklari dispanseri buyurtmachiligida 224253 va 224395-sonli lotlar bo‘yicha o‘tkazilgan jami 33,2 million so‘mlik davlat xaridlarida ishtirok etgan Zarbdor tumanidagi “T.M.P.” va “T.S” MCHJlarning rahbar va ta’sischisi bir kishiga tegishli ekanligiga qaramay, xarid komissiyasi tomonidan ushbu holatlarga baho berilmagan.
Yuqorida keltirilgan davlat xaridlardagi qonunbuzilishlar yuzasidan buyurtmachilarga xarid komissiyasining bayonnomasini bekor qilish bo‘yicha taqdimnomalar kiritildi”, — deyiladi agentlik xabarida.
Bundan tashqari, shu kunning o‘zida qonunbuzilish holatlariga huquqiy baho berish uchun to‘plangan materiallar Bosh prokuraturaga yuborilgan.
Izoh (0)