Samarqand viloyati kardiologiya dispanseri tomonidan 9-yanvar kuni muassasaga 2 ta ultratovushli asbob sotib olish bo‘yicha tender e’lon qilingandi. “Daryo” kuzatuviga ko‘ra, tenderda ishtirok etgan ikkita tadbirkorlik subyekti bir odamga tegishli ekani ma’lum bo‘lgan.
Korrupsiyaga qarshi kurashish agentligi mazkur maqola yuzasidan munosabat bildirdi. Aniqlanishicha, tibbiyot markazining viloyat filiali xarid komissiyasining 2023-yil 17-yanvardagi bayonnomasi bilan “Tib Dunyosi” MCHJ tanlash g‘olibi, “Turhan Islam” MCHJ esa zaxiradagi g‘olib deb topilgan.
O‘rganishda mazkur ikki jamiyat bir shaxsga tegishli ekanligi, biroq xarid komissiyasi tomonidan o‘zaro affillangan ishtirokchilar xarid jarayonidan chetlatilmasdan “Davlat xaridlari to‘g‘risida”gi qonunning 42-moddasi talablari qo‘pol ravishda buzilganligi aniqlangan.
Shu va boshqa qonun buzilishi holatlari yuzasidan 17-yanvar kuni (bayonnoma tasdiqlangan kunning o‘zida) Sog‘liqni saqlash vazirligiga ushbu tanlash yuzasidan xarid komissiyasi bayonnomasini bekor qilish yuzasidan taqdimnoma kiritilgan. Bundan tashqari, shu kunning o‘zida qonun buzilishi holatlariga huquqiy baho berish uchun to‘plangan hujjatlar Bosh prokuraturaga yuborilgan.
Izoh (0)