“Дарё” нашрининг “Кун тендерлари” рукни остида 27 январь куни эълон қилган мақоласида бир қатор шубҳали тендер савдолари ҳақида маълумот берилганди. Коррупцияга қарши курашиш агентлиги материалга муносабат билдириб, ноқонуний ҳолатлар юзасидан чора кўрилганини маълум қилди.
Жумладан, “Намангандонмаҳсулотлари” АЖ буюртмачилигида 224608-сонли лот бўйича ўтказилган 200 миллион сўмлик давлат харидида “Давлат харидлари тўғрисида”ги қонуннинг 10, 14, 23 ва 42-моддалари ҳамда “Рақобат тўғрисида”ги қонун талаблари бузилган. Харидда иштирок этган “Т.А.”, “А.Л.” ва “С.А.” МЧЖларнинг раҳбари бир шахс бўлгани ҳолати яққол кўриниб турган бўлса-да, харид комиссияси томонидан ушбу иштирокчиларни четлатиш чоралари кўрилмаган.
Шунингдек, “Тошкент иссиқлик маркази” унитар корхонаси буюртмачилигида 222662-сонли лот билан электр двигателларни капитал таъмирлаш учун ўтказилган 2,4 миллиард сўмлик давлат харидида иштирок этган 3 та субъектдан 2 таси, жумладан, Тошкент шаҳридаги “М.” ва “Э.С” МЧЖларнинг таъсисчиси ҳам бир шахсга тегишли экани аниқланган. Ҳолат юзасидан эса харид комиссияси томонидан уларни четлатиш чоралари кўрилмаган.
Чуст туман Тиббиёт бирлашмаси буюртмачилигида 222920-сонли лот бўйича 57,5 миллион сўмлик тиббиёт тарозисини сотиб олиш учун ўтказилган давлат харидида ҳам Наманган шаҳридаги раҳбари ва таъсисчиси айнан бир шахс бўлган “Б.М.” ва “Г” МЧЖлар иштирок этиб, қонунбузилишларга йўл қўйилган.
Жиззах вилоят тери-таносил касалликлари диспансери буюртмачилигида 224253 ва 224395-сонли лотлар бўйича ўтказилган жами 33,2 миллион сўмлик давлат харидларида иштирок этган Зарбдор туманидаги “Т.М.П.” ва “Т.С” МЧЖларнинг раҳбар ва таъсисчиси бир кишига тегишли эканлигига қарамай, харид комиссияси томонидан ушбу ҳолатларга баҳо берилмаган.
Юқорида келтирилган давлат харидлардаги қонунбузилишлар юзасидан буюртмачиларга харид комиссиясининг баённомасини бекор қилиш бўйича тақдимномалар киритилди”, — дейилади агентлик хабарида.
Бундан ташқари, шу куннинг ўзида қонунбузилиш ҳолатларига ҳуқуқий баҳо бериш учун тўпланган материаллар Бош прокуратурага юборилган.
Изоҳ (0)