25-yanvar kuni O‘zbekiston Respublikasi tovar-xomashyo birjasida 100 dan ortiq tenderlar amalga oshirildi. “Daryo” muxbiri Abduqahhor Qosimov hujjatlarni monitoring qilib, eng e’tiborga molik savdolar haqida ma’lumot beradi.
Aka-uka munosabatlari?
Jizzax viloyat Giyohvandlikka qarshi kurash dispanseri autsorsing xizmati uchun umumiy qiymati 135 million so‘mlik 3 ta tender o‘tkazgan. Unda “Firdavs Maxmud o‘g‘li” MCHJ g‘olib bo‘lgan.
G‘olib korxona rahbari Ulug‘murodov Maxmud G‘aybullayevich hisoblanadi.
Tender komissiyasi a’zolaridan birining ismi esa Ulukmuradov Baxtiyor G‘aybullayevich.
Bu ikki shaxs o‘rtasida qarindoshchilik aloqalari bormi, aka-uka hisoblanadimi, tenderda manfaatlar to‘qnashuvi yuz berdimi?
“Daryo” muxbiri holat yuzasidan izoh olish uchun bir necha bor tadbirkor bilan bog‘lanishga harakat qildi, ammo har safar “ovoz pochtasi”ga tushdi.
Bir buxgalterli raqobatchilar
Toshkent viloyati Bekobod shahar Tibbiyot birlashmasi issiq ovqat tayyorlab berish xizmati uchun umumiy qiymati 416 million so‘mdan ortiq bo‘lgan tenderlar o‘tkazgan. Unda Famous-Food 77 va “Sardorbek Gulasal Omad” MCHJlar raqobatlashgan.
Tender g‘olibi bo‘lgan Famous-Food 77 MCHJning ta’sischisi va rahbari Fozilkarimov Odil Muhammadqodirovich hisoblanadi. Korxona Toshkent viloyati Bekobod shahrida joylashgan.
.jpg)
Zaxira g‘olib “Sardorbek Gulasal Omad” MCHJ bo‘lib, uning rahbari — Samandarov A’zam Erkinovich.
Ochiq ma’lumotlarni ko‘zdan kechirish jarayonida ikki tadbirkorlik subyektining aloqa telefon raqamlari bir xil ekani ma’lum bo‘ldi.
“Daryo” muxbiri holat bo‘yicha izoh olish maqsadida ko‘rsatilgan telefon raqamiga qo‘ng‘iroq qildi va go‘shakni ko‘targan shaxs o‘zini Fozilkarimov Odil ekanini tasdiqladi. Unga tushunarsiz vaziyat bo‘yicha savol berganimizda: “Balki adashishgandir, chunki buxgalterimiz bitta, aslida tanish emasmiz”, — deb javob berdi.
O‘quvchilar uchun 33 milliard so‘m
Xorazm viloyati Xalq ta’limi boshqarmasi 1—4-sinf o‘quvchilarini bepul ovqat bilan ta’minlash xizmati uchun jami 33 ta tender o‘tkazgan. Savdolarning umumiy qiymati esa 33 milliard 627 million so‘mdan ortiqni tashkil etadi. Xarid budjet mablag‘laridan moliyalashtiriladi.
Lotlar izohida tuman va shaharlardagi xalq ta’limi bo‘limlariga qarashli ta’lim muassasalarining har birini ovqat bilan ta’minlash kerakligi yozib qo‘yilgan.
Tenderlarni “Xonqa Diyor”, “Hazorasp-Savdo-Servis”, ”Mehriniso Noni”, “Dunyo Jannat Gullari” kabi 10 ga yaqin tadbirkorlik subyektlari yutib olgan.
Mas’ullardan ushbu tenderlar natijalariga e’tibor qaratib, noqonuniy holatlar bo‘yicha tegishli choralar ko‘rishni so‘raymiz.
Izoh (0)