25 январь куни Ўзбекистон Республикаси товар-хом ашё биржасида 100 дан ортиқ тендерлар амалга оширилди. “Дарё” мухбири Абдуқаҳҳор Қосимов ҳужжатларни мониторинг қилиб, энг эътиборга молик савдолар ҳақида маълумот беради.
Ака-ука муносабатлари?
Жиззах вилоят Гиёҳвандликка қарши кураш диспансери аутсорсинг хизмати учун умумий қиймати 135 миллион сўмлик 3 та тендер ўтказган. Унда “Фирдавс Maxмуд ўғли” МЧЖ ғолиб бўлган.
Ғолиб корхона раҳбари Улуғмуродов Maxмуд Ғайбуллаевич ҳисобланади.
Тендер комиссияси аъзоларидан бирининг исми эса Улукмурадов Бахтиёр Ғайбуллаевич.
Бу икки шахс ўртасида қариндошчилик алоқалари борми, ака-ука ҳисобланадими, тендерда манфаатлар тўқнашуви юз бердими?
“Дарё” мухбири ҳолат юзасидан изоҳ олиш учун бир неча бор тадбиркор билан боғланишга ҳаракат қилди, аммо ҳар сафар “овоз почтаси”га тушди.
Бир бухгалтерли рақобатчилар
Тошкент вилояти Бекобод шаҳар Тиббиёт бирлашмаси иссиқ овқат тайёрлаб бериш хизмати учун умумий қиймати 416 миллион сўмдан ортиқ бўлган тендерлар ўтказган. Унда Famous-Food 77 ва “Сардорбек Гуласал Омад” МЧЖлар рақобатлашган.
Тендер ғолиби бўлган Famous-Food 77 МЧЖнинг таъсисчиси ва раҳбари Фозилкаримов Одил Муҳаммадқодирович ҳисобланади. Корхона Тошкент вилояти Бекобод шаҳрида жойлашган.
.jpg)
Захира ғолиб “Сардорбек Гуласал Омад” МЧЖ бўлиб, унинг раҳбари — Самандаров Аъзам Эркинович.
Очиқ маълумотларни кўздан кечириш жараёнида икки тадбиркорлик субъектининг алоқа телефон рақамлари бир хил экани маълум бўлди.
“Дарё” мухбири ҳолат бўйича изоҳ олиш мақсадида кўрсатилган телефон рақамига қўнғироқ қилди ва гўшакни кўтарган шахс ўзини Фозилкаримов Одил эканини тасдиқлади. Унга тушунарсиз вазият бўйича савол берганимизда: “Балки адашишгандир, чунки бухгалтеримиз битта, аслида таниш эмасмиз”, — деб жавоб берди.
Ўқувчилар учун 33 миллиард сўм
Хоразм вилояти Халқ таълими бошқармаси 1—4-синф ўқувчиларини бепул овқат билан таъминлаш хизмати учун жами 33 та тендер ўтказган. Савдоларнинг умумий қиймати эса 33 миллиард 627 миллион сўмдан ортиқни ташкил этади. Харид бюджет маблағларидан молиялаштирилади.
Лотлар изоҳида туман ва шаҳарлардаги халқ таълими бўлимларига қарашли таълим муассасаларининг ҳар бирини овқат билан таъминлаш кераклиги ёзиб қўйилган.
Тендерларни “Хонқа Диёр”, “Ҳазорасп-Савдо-Сервис”, ”Меҳринисо Нони”, “Дунё Жаннат Гуллари” каби 10 га яқин тадбиркорлик субъектлари ютиб олган.
Масъуллардан ушбу тендерлар натижаларига эътибор қаратиб, ноқонуний ҳолатлар бўйича тегишли чоралар кўришни сўраймиз.
Изоҳ (0)