IT Park muvaffaqiyatga erishishda yosh to‘sqinlik qila olmasligini isbotlay olgan mutaxassislarning hayotiy hikoyalari bilan bo‘lishishda davom etadi.
IT-mutaxassisi ruknining bu galgi qahramoni — Muhammadjon Qobuljonov. U Andijon viloyatining Asaka tumanida tug‘ilib o‘sgan. Hozirda shu tumandagi 2-sonli kasb-hunar kollejining 2-bosqich talabasi.
Qahramonimiz dasturchilik sohasiga 13 yoshida kirib kelgan. Mutaxassisligi bo‘yicha dasturchi va veb-dizayner.
Muhammadjonda yoshlikdan ushbu sohaga juda katta qiziqish bo‘lgan. Shuningdek, raqamli texnologiyalar yo‘nalishidagi mutaxassislarga bo‘lgan talabning yuqoriligini hisobga olgan holda IT sohasiga kirishga qaror qilgan.
Uning aytishicha, boshlanishida barcha darslar masofaviy tarzda o‘tilgani o‘zlashtirish jarayonini biroz qiyinlashtirgan.
Keyinchalik 2020- ochilgan IT-markazda tahsil olib, UDM, One Million Uzbek Coders va Mohirdev tomonidan tashkil etilgan kurslarni tamomlagan.
Hozirda o‘quv markazida ta’lim bo‘yicha mutaxassis. Frilanser. Daromadi oyiga o‘rtacha 700 dollardan 1000 dollargacha.
Yosh bo‘lishiga qaramay, Muhammadjon 20 dan ortiq loyihalarni muvaffaqiyatli yakunlashga ulgurgan.
Loyihalari qatoridan Rossiya va Belorussiya kabi davlatlar ham o‘rin olgan. Muhammadjonning fikricha IT-sohasida jamoaviy ishlashning o‘rni juda muhim.
U loyihalarni yaratayotganda Frontend va Backend qismlarini alohida mutaxassislar bajarsa u yanada sifatliroq va tezroq yakunlanadi deb hisoblaydi.
Kelajakda senior dasturchi darajasiga ko‘tarilib, frilans ravishda ishlovchi jamoani shakllantirishni orzu qiladi.
Muhammadjon o‘zining misolida ishtiyoqi bo‘lgan har qanday inson IT mutaxassisi bo‘lishi mumkinligini ko‘rsatib bermoqda. Asosiysi — intilish, mehnat qilish va o‘rganishga bo‘lgan qiziqish.
Izoh (0)