IT Park муваффақиятга эришишда ёш тўсқинлик қила олмаслигини исботлай олган мутахассисларнинг ҳаётий ҳикоялари билан бўлишишда давом этади.
IT-мутахассиси рукнининг бу галги қаҳрамони — Муҳаммаджон Қобулжонов. У Андижон вилоятининг Асака туманида туғилиб ўсган. Ҳозирда шу тумандаги 2-сонли касб-ҳунар коллежининг 2-босқич талабаси.
Қаҳрамонимиз дастурчилик соҳасига 13 ёшида кириб келган. Мутахассислиги бўйича дастурчи ва веб-дизайнер.
Муҳаммаджонда ёшликдан ушбу соҳага жуда катта қизиқиш бўлган. Шунингдек, рақамли технологиялар йўналишидаги мутахассисларга бўлган талабнинг юқорилигини ҳисобга олган ҳолда IT соҳасига киришга қарор қилган.
Унинг айтишича, бошланишида барча дарслар масофавий тарзда ўтилгани ўзлаштириш жараёнини бироз қийинлаштирган.
Кейинчалик 2020- очилган IT-марказда таҳсил олиб, UDМ, One Million Uzbek Coders ва Mohirdev томонидан ташкил этилган курсларни тамомлаган.
Ҳозирда ўқув марказида таълим бўйича мутахассис. Фрилансер. Даромади ойига ўртача 700 доллардан 1000 долларгача.
Ёш бўлишига қарамай, Муҳаммаджон 20 дан ортиқ лойиҳаларни муваффақиятли якунлашга улгурган.
Лойиҳалари қаторидан Россия ва Белоруссия каби давлатлар ҳам ўрин олган. Муҳаммаджоннинг фикрича IT-соҳасида жамоавий ишлашнинг ўрни жуда муҳим.
У лойиҳаларни яратаётганда Frontend ва Backend қисмларини алоҳида мутахассислар бажарса у янада сифатлироқ ва тезроқ якунланади деб ҳисоблайди.
Келажакда senior дастурчи даражасига кўтарилиб, фриланс равишда ишловчи жамоани шакллантиришни орзу қилади.
Муҳаммаджон ўзининг мисолида иштиёқи бўлган ҳар қандай инсон IT мутахассиси бўлиши мумкинлигини кўрсатиб бермоқда. Асосийси — интилиш, меҳнат қилиш ва ўрганишга бўлган қизиқиш.
Изоҳ (0)