O‘zbekistonga kelgan anomal sovuq Toshkent hokimi va Energetika vaziri o‘rinbosarining ishdan ketishiga sabab bo‘ldi: “Daryo”da hafta dayjesti

Yakunlangan hafta Toshkent shahri hokimi Jahongir Ortiqxo‘jayevning ishdan olinishi, Energetika vaziri o‘rinbosarining lavozimidan ketishi, Toshkent viloyati hokimi Zoir Mirzayevning ogohlantirilishi va Chirchiq shahri hokimiga hayfsan berilishi bilan jamoatchilik yodida qoladigan bo‘ldi. “Daryo” har doimgidek yakunlangan haftaning eng shov-shuvli ovqealari ketma-ketligini esga oladi.

2018-yilning 26-aprelidan beri Toshkent shahri hokimi sifatida faoliyat yuritib kelgan Jahongir Ortiqxo‘jayev 2023-yilning 16-yanvar kuni lavozimidan olingani va prezidentning “noinsof”, “oyog‘i yerdan uzilgan” degan ta‘riflariga lozim ko‘rilgani ma‘lum bo‘ldi.

Shavkat Mirziyoyev 2018-yilning 30-aprel kuni Toshkentda Turkiya biznesi va banklari rahbarlari qarshisida nutq so‘zlayotib, ularga Toshkentning endigina ish boshlagan yangi hokimi — Jahongir Ortiqxo‘jayevni tanishtirganida “Men O‘zbekiston tarixida birinchi marta o‘zim ishonadigan tadbirkorni Toshkent hokimi etib tayinladim. Bunaqasi tarixda bo‘lmagan”, — degandi. Shuningdek, davlat rahbari bu tayinlov orqali joriy islohotlarni tushunadigan, byurokratiyadan uzoq bo‘lgan, Toshkent shahrining ertangi kuni qanday bo‘lishini tasavvur qiladigan, zamonaviy yigit O‘zbekistonga toza havo kirishi uchun, investorlarni qo‘llab-quvvatlash uchun tayinlaganini qo‘shimcha qilgandi. 2023-yilning 16-yanvar kuni tanqidiy yig‘ilish o‘tkazgan Shavkat Mirziyoyev Jahongir Ortiqxo‘jayevni noinsof ва oyog‘i yerdan uzilgan rahbar deya tanqid qildi ва uni 15-yanvar kuni tunda ishdan olganini e‘lon qildi. Prezident Jahongir Ortiqxo‘jayevni poytaxt qish mavsumiga tayyorgarlik ko‘rmagani, shuningdek, shaharda noqonuniy qurilishlar ko‘paygani sababchisi deya atadi.

Qish mavsumiga lozim tarzda tayyorgarlik ko‘rmagani uchun Ortiqxo‘jayevni ishdan oldim. Kechasi shtabda men uni ishdan oldim. Quruq gap, yolg‘on hisobot bilan, pastga tushmagani uchun, noinsof, oyog‘i yerdan uzilgani uchun ishdan oldim — dedi prezident Ortiqxo‘jayevning ishdan olinishi haqida gapirar ekan.

Mazkur haftada, shuningdek, Telegram messenjerida tarqalgan videolardan biri tarmoqning qoraqalpoq segmentida ko‘pchilik e’tiborini tortdi. Unda suvchi -20 gradus sovuq bo‘lishiga qaramasdan yorilgan trubani yamashga uringan va vazifasini a’lo darajada uddalagan.

“Daryo” muxbiri Telegram'dagi qoraqalpoq segmentining e‘tiborini torgan video qahramonini izlab topdi. Ma‘lum bo‘lishicha, videodagi holat 2023-yilning 14-yanvar kuni Nukus shahrida yuz bergan. Video qahramoni esa “Qoraqalpoq suv ta‘minoti”da ta‘mirlovchi bo‘lib ishlaydigan 46 yoshli Jetkerbay Qo‘sbergenov bo‘lgan.

Ta‘kidlanishicha, anomal sovuq sabab yer tagidagi suv quvurlarida “avariya” yuz bergan. Vaziyatni o‘nglash uchun Jetkerbay Qo‘sbergenov javobgar bo‘lgan. Shu sabab, qolaversa, kasbiga bo‘lgan muhabbati sabab u sovuq havoni ham pisand qilmay vazifasini oxirigacha bajargan.

To‘g‘ri, o‘sha kuni juda sovuq edi. Lekin kasbimiz shu bo‘lgani uchun vaziyatga javob berishimiz kerak. Nosozlik bartaraf etilmasa, aholi suvsiz qolardi. Kasbimiz mashaqqatli, ammo kasbimni sevaman. Shuning uchun kun-u tun vazifamizni sidqidildan bajarishga harakat qilyapmiz, — deydi u.

Video qoraqalpoq segmenti e‘tirofiga sazovor bo‘lib, shu kasb egalariga nisbatan odamlar olqishini, ularga bo‘lgan muhabbatini izhor qilishiga sabab bo‘lgan.

Bu haftada, shuningdek, Nukus voqealari aybdorlari ishini ko‘rib chiqayotgan sudda ayblanuvchilarning so‘nggi so‘zi tinglandi. Qolaversa, sud 80 yoshli onasi va nogiron akasini muntazam kaltaklab kelgan fuqaroga 15 sutka qamoq jazosini tayinladi.

Qashqadaryoda esa Dok-1 Maks siropini iste’mol qilib, vafot etgan 1,5 yoshli bolaning otasi farzandi bilan kechgan jarayon haqida, shuningdek bola uning to‘ng‘ich farzandi bo‘lgani haqida gapirib berdi.

O‘g‘limda yo‘tal paydo bo‘lganidan keyin qishloq shifokoriga murojaat qildik. Shifokor bolaning ahvoli yaxshi, “Dok-1 Maks” siropini ichirsangiz yaxshi bo‘ladi dedi. Avval bunchalik qattiq yo‘tal bo‘lmagan edi, — deydi u.

Bola ushbu siropni o‘n kun davomida iste’mol qilgan.

13-dekabr kuni shifokor ushbu dori vositasini tavsiya qildi. Oradan ikki kun o‘tganidan keyin shifokor boladan xabar olishga kelganida, dorini hali ham olib kelmaganligimizni aytdik. 16-dekabr kuni ukam bilan dadam tuman markazidagi dorixonaga borib, uni Sanjar degan kishidan sotib olgan. O‘sha kuni kechki paytdan boshlab bolamga ichirilgan, – deydi Jasur Lafasov.

“Dok-1 Maks” dori vositasi bolaga shifokor tavsiyasiga ko‘ra, kuniga to‘rt mahaldan ichirilgan.

Kuniga to‘rt mahaldan ichira boshladik. Shundan so‘ng, yo‘tal to‘xtadi ammo uch, to‘rt kun davomida peshob ajralmayotganligini sezdik. Keyin bolam qusa boshladi. Ahvoli yaxshi bo‘lavermagach, 26-dekabr kuni kechki payt dadam va onam bolamni olib tuman markaziy shifoxonasining shoshilinch tibbiy yordam bo‘limiga borishgan. Tuman shifokorlari kasallik nimadan ekanligini aniqlay olishmagan. Ertasiga, 27-dekabr kuni viloyat bolalar shifoxonasiga jo‘natishgan. Bolalar shifoxonasi esa qabul qilmagan. Respublika shoshilinch tibbiy yordam ilmiy markazining Qarshi filialiga olib borilganida shifokorlar o‘g‘limni “Dok-1 Maks”dan zaharlanganini aytishgan.

O‘sha yerda ishlaydigan Akmal ismli shifokor bolani Toshkentga olib borish kerakligini aytgan va uni poytaxtga olib ketishayotganida yarim yo‘ldan qaytarishgan. 28-dekabr kuni esa meni chaqirishdi. Men ishdan chiqib borganimda bolamning ahvoli sal yaxshiroq edi. Ismini aytib, chaqirganimda menga qaradi. Keyin komadagidek ahvolga tushib qoldi. O‘sha kuni o‘g‘lim vafot etdi. Vafot etganidan keyin IIB xodimlari kelib qoldi. Kechqurun bolamni ekspertizaga olib ketishdi. Meni esa DXX binosiga taklif qilishdi. Dori qachon va qayerdan sotib olingani kabi savollar berishib, Hindistonda shu dorini ishlab chiqaruvchilarga qarshi choralar ko‘rilishini, ushbu dori vositasi kim tomonidan O‘zbekistonga olib kelingan bo‘lsa, ularning hammasi qo‘lga olinganini aytishdi, — deydi u muxbir bilan muloqotida.

Jasur Lafasovning aytishicha, hukumat vakillari shifokorlarda ayb yo‘qligini ta’kidlagan. Tibbiy ekspertiza natijalariga ko‘ra, uning buyragi va jigari batamom ishdan chiqqan hamda jigari kattalashib ketganligi aytilgan.

Shundan so‘ng O‘zbekistonda “Dok-1 Maks” siropidan vafot etgan bolalar oilalariga kompensatsiya to‘lanishi mumkinligi aytildi. Sog‘liqni saqlash vaziri o‘rinbosari Elmira Bositxonova Xalqaro press-klubning 18-yanvardagi sessiyasida “Dori ichganligi to‘g‘risida ota-onasining suhbatidan aniqlangan. Qaysi dorini ichgan, qaysi doridan zaharlangani hujjat bilan tasdiqlansagina, kompensatsiya to‘lash bo‘yicha yuridik jarayonlar boshlanishi mumkin bo‘ladi, — dedi.

Yakunlangan hayfada shuningdek, Toshkent viloyati Angren shahri prokurorining qilmishi ko‘pchilikning e’tiborini tortdi.

Telegram’dagi kanallarda Angren shahri prokurori Ulug‘bek Habiljonovning shahardagi 22-maktabdan turib, mas’ullarga videomurojaat qilgani, unda maktab hududi qordan tozalanmagani, o‘qituvchilari esa ishga kelmay maosh olayotgani aytilgandi.Mazkur video qisqa fursatda ijtimoiy tarmoq foydalanuvchilarining keskin e’tiroziga sabab bo‘ldi. Va ko‘pchilik prokurorni o‘qituvchilarni majburiy mehnatga da’vat qilmoqda, degan fikrlarni bildirdi.

Voqeaga e’tibor qaratgan maktabgacha va maktab ta’limi vaziri Hilola Umarova vaziyat yuzasidan Bosh prokuratura rahbariyati bilan gaplashganini, holat ayni damda nazoratga olinganini yozdi.

Prezidentimizning tegishli qarorlariga asosan pedagog xodimlarini xizmat majburiyati bilan bog‘liq bo‘lmagan ishlarga jalb qilish qat’iyan taqiqlanganini eslatib o‘taman. O‘qituvchi qadrlanmagan yurt hech qachon taraqqiy etmaydi. Shu bois barchadan jumladan mutasaddi rahbarlarimizdan bugun davlatimiz rahbari tomonidan olib borilayotgan o‘qituvchilarni ulug‘lash va jamiyatda eng obro‘li inson qilish davlat siyosatini qo‘llab-quvvatlab, bu borada eng avvalo o‘zimiz o‘rnak ko‘rsatishimizni so‘rab qolaman, — dedi vazir.

Ko‘p o‘tmay Angren shahri prokurori aytgan gaplari uchun uzr so‘rab chiqdi. Va o‘qituvchi-murabbiylarga nisbatan hurmati cheksiz ekanini qo‘shimcha qildi.

So‘zim avvalida o‘qituvchi va murabbiylarga chuqur hurmat saqlagan holda ulardan uzr so‘rab qolaman. Xabaringiz bor, kecha ijtimoiy tarmoqlarda mening Angren shahridagi 22-sonli umumta’lim maktab hududi qordan tozalanmaganligi bo‘yicha qilgan videoxabarim tarqalib, keng muhokamalarga sabab bo‘lmoqda. Joriy yilning 18-yanvar kuni shahar hududidagi maktablarning o‘quv yiliga tayyorgarlik holatini o‘rganish maqsadida shaharda 4 ta sektor rahbari bilan maktablarda o‘rganish olib bordik. 22-son umumta’lim maktab hududida bo‘lgan vaqtimizda maktab hududi qorlardan tozalanmaganligi va o‘quv jarayonida o‘qituvchi va o‘quvchilarning sog‘lig‘iga xavf tug‘dirishini inobatga olib, Telegram ijtimoiy tarmog‘ida ma’muriyatga maktabda tozalash ishlariga mas’ul ishchilar ham ishni bajarmaganligini bildirib, buni bartaraf qilish lozimligini aytganman.

Aslida men maktab hududini o‘qituvchi murabbiylarimiz emas, balki ushbu ishga mas’ul shaxslar (farrosh vahokazo) bajarishini tashkillashtirishni so‘raganman. Men, ushbu holatdan qattiq afsusdaligimni bildirib, bizga ta’lim berib kelayotgan yosh avlodni tarbiyalashda jonbozlik ko‘rsatayotgan barcha o‘qituvchi va murabbiylardan uzr so‘rab qolaman, — dedi takroriy videomurojaat qilib chiqqan prokuror.

Angren shahar hokimligi axborot xizmati rahbari Gulshoda Shahanovaning “Daryo”ga bildirishicha, prokurorning maktab hududi qordan tozalanmagani aytilgan videoxabar shahar mas’ullari uchun tashkil qilingan “Angren jarayon” guruhiga yuborilgan.

Bu guruhga shahar hokimi, prokuror va IIB rahbarlaridan tortib, mahalladagi xotin-qizlar faollarigacha jalb qilingan bo‘lib, guruhda taxminan 300-400 nafar kuzatuvchi bor. Guruhga hududdagi muammolar tashlanadi va mas’ullar e’tibori qaratiladi. Shuningdek, internet saytlarida, Telegram kanallarida chiqqan xabarlar ham tashlanib, muammoga yechim topiladi. Prokurorning videoxabari ham shu guruhga muhokama uchun yuborilgan bo‘lib, bu orqali mas’ullarni e’tiborli bo‘lishga chaqirish maqsad qilingan, — dedi shahar hokimligi axborot xizmati rahbari.

“Daryo” nashrining rasmiy sayti va uning ijtimoiy tarmoqlardagi sahifalarini kuzatsangiz shu va shunga o‘xshash voqealarning batafsil tafsiloti bilan tanishib borasiz.