Angren prokurorining muhokamalarga sabab bo‘lgan videosi: aslida nima bo‘lgan edi? (video)

Telegram’dagi kanallarda Angren shahri prokurori Ulug‘bek Habiljonovning shahardagi 22-maktabdan turib, mas’ullarga videomurojaat qilgani, unda maktab hududi qordan tozalanmagani, o‘qituvchilari esa ishga kelmay maosh olayotgani aytilgandi.

Mazkur video qisqa fursatda ijtimoiy tarmoq foydalanuvchilarining keskin e’tiroziga sabab bo‘ldi. Va ko‘pchilik prokurorni o‘qituvchilarni majburiy mehnatga da’vat qilmoqda, degan fikrlarni bildirdi.

Voqeaga e’tibor qaratgan maktabgacha va maktab ta’limi vaziri Hilola Umarova vaziyat yuzasidan Bosh prokuratura rahbariyati bilan gaplashganini, holat ayni damda nazoratga olinganini yozdi.

Prezidentimizning tegishli qarorlariga asosan pedagog xodimlarini xizmat majburiyati bilan bog‘liq bo‘lmagan ishlarga jalb qilish qat’iyan taqiqlanganini eslatib o‘taman. O‘qituvchi qadrlanmagan yurt hech qachon taraqqiy etmaydi. Shu bois barchadan jumladan mutasaddi rahbarlarimizdan bugun davlatimiz rahbari tomonidan olib borilayotgan o‘qituvchilarni ulug‘lash va jamiyatda eng obro‘li inson qilish davlat siyosatini qo‘llab-quvvatlab, bu borada eng avvalo o‘zimiz o‘rnak ko‘rsatishimizni so‘rab qolaman, — dedi vazir.

2022-yilning dekabr oyida o‘qituvchilarni majburiy mehnatga jalb qilmaslik xususida gapirib, mas’ullar murojaat qilgan Prezident administratsiyasi ijro etuvchi apparatining kommunikatsiyalar va axborot siyosati bo‘yicha sho‘ba mudiri Saida Mirziyoyeva “Endi bu ishlarni to‘xtatish vaqti keldi. Chunki o‘qituvchilar qadrini ko‘tarmas ekanmiz, hech narsaga erisha olmaymiz. O‘qituvchilarga vazifasidan tashqari ishlarni yuklaydiganlarni ma’muriy va jinoiy javobgarlikka tortish bo‘yicha qonun loyihasi ishlab chiqildi va tez orada qabul qilinishi kutilyapti”, — degandi.

Saida Mirziyoyeva o‘shanda o‘zbekistonliklarning farzandiga ta’lim berayotgan o‘qituvchilar yillar davomida haq-huquqsiz, himoyasiz, qadrsiz bo‘lganini qo‘shimcha qilgandi.

O‘qituvchilardan yillar davomida farrosh, komissiyaga xizmat ko‘rsatuvchi ofitsiant, bo‘sh zallarni to‘ldiruvchi “massovka” sifatida foydalanildi. Afsuski, farzandlarimizga ta’lim berayotgan o‘qituvchilar yillar davomida haq-huquqsiz, himoyasiz, qadrsiz bo‘ldi. Ulardan bog‘bon, farrosh, maktabga kelgan komissiyalarga xizmat ko‘rsatuvchi ofitsiant, zerikarli tadbirlarda bo‘sh zallarni to‘ldiruvchi “massovka”, matbuot nashrlariga majburiy obunachi, tungi navbatchi va maktab qorovuli sifatida foydalanildi, — degandi Saida Mirziyoyeva.

Ko‘p o‘tmay Angren shahri prokurori aytgan gaplari uchun uzr so‘rab chiqdi. Va o‘qituvchi-murabbiylarga nisbatan hurmati cheksiz ekanini qo‘shimcha qildi.

So‘zim avvalida o‘qituvchi va murabbiylarga chuqur hurmat saqlagan holda ulardan uzr so‘rab qolaman. Xabaringiz bor, kecha ijtimoiy tarmoqlarda mening Angren shahridagi 22-sonli umumta’lim maktab hududi qordan tozalanmaganligi bo‘yicha qilgan videoxabarim tarqalib, keng muhokamalarga sabab bo‘lmoqda. Joriy yilning 18-yanvar kuni shahar hududidagi maktablarning o‘quv yiliga tayyorgarlik holatini o‘rganish maqsadida shaharda 4 ta sektor rahbari bilan maktablarda o‘rganish olib bordik. 22-son umumta’lim maktab hududida bo‘lgan vaqtimizda maktab hududi qorlardan tozalanmaganligi va o‘quv jarayonida o‘qituvchi va o‘quvchilarning sog‘lig‘iga xavf tug‘dirishini inobatga olib, Telegram ijtimoiy tarmog‘ida ma’muriyatga maktabda tozalash ishlariga mas’ul ishchilar ham ishni bajarmaganligini bildirib, buni bartaraf qilish lozimligini aytganman.

Aslida men maktab hududini o‘qituvchi murabbiylarimiz emas, balki ushbu ishga mas’ul shaxslar (farrosh vahokazo) bajarishini tashkillashtirishni so‘raganman. Men, ushbu holatdan qattiq afsusdaligimni bildirib, bizga ta’lim berib kelayotgan yosh avlodni tarbiyalashda jonbozlik ko‘rsatayotgan barcha o‘qituvchi va murabbiylardan uzr so‘rab qolaman, — dedi takroriy videomurojaat qilib chiqqan prokuror.

Angren shahar hokimligi axborot xizmati rahbari Gulshoda Shahanovaning “Daryo”ga bildirishicha, prokurorning maktab hududi qordan tozalanmagani aytilgan videoxabar shahar mas’ullari uchun tashkil qilingan “Angren jarayon” guruhiga yuborilgan.

Bu guruhga shahar hokimi, prokuror va IIB rahbarlaridan tortib, mahalladagi xotin-qizlar faollarigacha jalb qilingan bo‘lib, guruhda taxminan 300-400 nafar kuzatuvchi bor. Guruhga hududdagi muammolar tashlanadi va mas’ullar e’tibori qaratiladi. Shuningdek, internet saytlarida, Telegram kanallarida chiqqan xabarlar ham tashlanib, muammoga yechim topiladi. Prokurorning videoxabari ham shu guruhga muhokama uchun yuborilgan bo‘lib, bu orqali mas’ullarni e’tiborli bo‘lishga chaqirish maqsad qilingan, — deydi shahar hokimligi axborot xizmati rahbari.

Mas’ulning qo‘shimcha qilishicha, prokurorning videomurojaatida xulosa qilishi kerakligi aytilgan Salim aka bu — shahar hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Salim Anorboyev, Alimjon aka esa Alimjon Asqarov bo‘lib, shahar XTB mudiri vazifasini vaqtincha bajaruvchi xodim bo‘lgan.

O‘sha kuni hokim va prokuror, IIB rahbari maktabga borganida 68 nafar o‘qituvchidan atigi 5 nafari ishda bo‘lgan. Prokuror o‘qituvchilar ishga kelmagani uchun bekordan bekor oylik olib yotishibdi degan gapni aytgan. Aslida qorni o‘qituvchilar tozalasin demagan. Maktabda 10 nafar texnik xodim bo‘lgan. Shular orqali tozalash nazarda tutilgan, — deydi Gulshoda Shahanova.

Prokurorning videochiqishidan so‘ng Telegram kanallarida o‘qituvchilarning maktab hovlisini qordan tozalayotgani tasvirlangan fotolar ham tarqaldi.

Ko‘pchilik mazkur fotolarni aynan Angren shahar prokurorining qilmishi deb izohlagan bo‘lsa, mas’ullar, xususan, Toshkent viloyati prokuraturasi ham maktab hovlisidagi qorlar maxsus texnikalar yordamida, shuningdek, Obodonlashtirish xodimlari ko‘magida tozalanganini ma’lum qildi.

“Daryo” nashrining bu haqdagi savoliga javob bergan Angren shahridagi 22-maktab rahbariyati esa maktab hovlisini muzdan tozalayotgan o‘qituvchilar surati aynan shu maktabda tasvirga olinganini, o‘qituvchilar o‘z xohishi bilan tozalash ishlarini qilganini, bundan norozi bo‘lmaganini bildirdi.