Toshkent shahridan oqib o‘tuvchi Anhor kanalida nafaqat yozning issiq kunlarida balki qishning qahraton sovug‘ida ham cho‘miladigan insonlar guruhi bor. Ularni ko‘pchilik “morj”lar deb atashadi.
“Daryo” muxbiri “Morj klubi” a’zolari bilan suhbatlashib, tanani turli havo haroratlarida chiniqtirishga qaratilgan guruh faoliyati haqida material tayyorladi.
“Morj klubi”ning direktori, nafaqadagi temiryo‘lchi To‘ra Qodirovning ma’lum qilishicha, O‘zbekistonda “Morjlar klubi”ga 1948-yilda asos solingan bo‘lsa-da, 1962-yilga kelibgina Sharof Rashidov boshchiligida rasman davlat ro‘yxatidan o‘tkazilgan.
“O‘sha yili anhor bo‘yida “morjlar” uchun shiypon qurilib, kiyim almashtirish uchun kabinalar o‘rnatilgan. 43 yildan buyon klub a’zosiman. Jamoa bilan kunda-kunora kelib turamiz. Ertalab kelib, cho‘milishdan avval bir soat badanni qizdirish uchun piyoda yuramiz. Keliboq suvga tushib bo‘lmaydi. Badan qizishi kerak”, — dedi klub rahbari.
To‘ra Qodirov Baykal ko‘lida — 40 daraja sovuq suvda ham cho‘milganini qo‘shimcha qildi.
Klub a’zolaridan biri Farhod Zokirovning aytishicha, u to‘rt yil avval insult bo‘lgan va bu kasallik asoratlarini yengib o‘tish maqsadida sovuq suvda cho‘milishni boshlagan.
“Shu yerga kelib cho‘milamiz, sovuq suv immunitetni ko‘taradi, tana tetik bo‘ladi. Qaysidir shifokorlar insult o‘tkazgan insonlar sovuq suvda cho‘milish mumkin emas desa, ba’zilari hozircha cho‘milmay turing, deydi. Lekin menda hech qanday yomon holat kuzatilgani yo‘q. Shu kungacha cho‘milishni kanda qilmay kelyapman”, — dedi Farhod Zokirov.
Hozirda klub a’zolar soni 30 nafarga yetgan. Unga a’zolik erkin va mutlaqo bepul.
Ma’lumot uchun, “morj”lar turli davlatlarda turlicha nom bilan ataladi. Masalan, Rossiya, Polsha, Niderlandiyada “morjlar”, Finlandiyada “qunduzlar”, Latviyada “tyulen”, Shimoliy Amerikada esa “qutb ayiqlari” deb ataladi.
Izoh (0)