Qashqadaryoda “Dok-1 Maks” siropini iste’mol qilgan 1,5 yoshli bola vafot etdi

Qashqadaryo viloyatining Dehqonobod tumanida tug‘ilgan 1,5 yoshli bola “Dok-1 Maks” siropini iste’mol qilishi ortidan vafot etdi. Bu haqda viloyat prokuraturasi xabar berdi.

Ma’lum qilinishicha, 2021-yil 14-avgust kuni viloyatning Dehqonobod tumanida tug‘ilgan bola X.SH. besh kun davomida “Dok-1 Maks” siropini iste’mol qilib kelib, sog‘lig‘i yomonlashgani sababli 27-dekabr kuni Respublika shoshilinch tibbiy yordam ilmiy-amaliy markazi Qashqadaryo filialiga olib kelingan. Bola ko‘rsatilgan tibbiy yordamga qaramasdan 28-dekabr kuni vafot etgan.

Mazkur holat yuzasidan Qarshi shahar prokuraturasi tomonidan Jinoyat kodeksining 186-3-moddasi (sifatsiz yoki qalbakilashtirilgan dori vositalarini yoxud tibbiy buyumlarni o‘tkazish maqsadida ishlab chiqarish, tayyorlash, olish, saqlash, tashish yoki o‘tkazish, dori vositalarini yoki tibbiy buyumlarni dorixonalardan va ularning filiallaridan tashqarida realizatsiya qilish, shuningdek, tarkibida kuchli ta’sir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.

Hurmatli fuqarolar, Sog‘liqni saqlash vazirligi Farmatsevtika tarmog‘ini rivojlantirish agentligining 2022-yil 23-dekabrdagi buyrug‘i bilan “Dok-1 Maks” dori vositalarini dorixonalardan qaytarib olish belgilangan. Shunga ko‘ra, sizlardan “Dok-1 Maks” dori vositalarini qabul qilmaslikni, ushbu dori vositalari sotilayotgani hamda tavsiya qilinayotganidan xabar topsangiz, darhol prokuratura va boshqa huquqni muhofaza qiluvchi organlarga xabar berishingizni so‘raymiz, — deyiladi viloyat prokuraturasi axborotida.

Mazkur siropni iste’mol qilish ortidan Samarqandda 18 nafar, Toshkent va Qashqadaryoda bir nafardan, jami 20 nafar bola vafot etgani ma’lum bo‘lgan.