Xitoyda qor ko‘chkisi avtotunnelning og‘zini to‘sib qo‘ydi. 28 kishi halok bo‘ldi (video)

Xitoyning Tibet avtonom tumanidagi avtomagistral tunnel ustiga qor ko‘chkisi kelib tushdi. Qidiruv-qutqaruv ishlari davomida 28 kishining jasadi topildi, deb xabar bermoqda BBC.

“Tibet shossesida qor ko‘chkisi ostida qolgan odamlarni qidirish bo‘yicha qutqaruv operatsiyasi yakunlandi. Halok bo‘lganlar soni kamida 28 kishi”, — deyiladi xabarda.

Qayd etilishicha, 17-yanvar kuni kechqurun Ninchi shahri yaqinidagi avtomagistral tunnelning og‘zini qor qoplagani sababli odamlar qariyb bir hafta mashinalar ichida qolib ketgan.

Mahalliy hokimiyat organlari 7,5 km uzunlikdagi o‘tish joyini qazish ishlariga 1 348 nafar qutqaruvchi va 236 ta texnika jo‘natgan. Qutqaruvchilarning so‘zlariga ko‘ra, qor ko‘chkisining yuzaga kelishiga kuchli shamol sabab bo‘lgan.