AQSH Adliya vazirligi xodimlari prezident Jo Baydenning Delaver shtati, Uilmington shahridagi uyida tintuv o‘tkazish chog‘ida maxfiy hujjatlarning yangi to‘plamini topdi. Bu haqda prezidentning advokati Rob Bauer jurnalistlarga ma’lum qildi.
Tintuv 20-yanvar, juma kuni bo‘lib o‘tgan va 12 soat davom etgan. Hammasi bo‘lib oltita hujjatda “maxfiy” va “tegishli materiallar” belgisi topilgan. Bauerning so‘zlariga ko‘ra, hujjatlarning bir qismi Bayden senator bo‘lgan davrga (u 1973-yildan 2009-yilgacha Delaver shtatidan Senat vakili bo‘lgan), ikkinchi qismi vitse-prezident bo‘lgan davrga (2009—2017-yillar) tegishli.
Bundan tashqari, advokatning aytishicha, Adliya vazirligi xodimlari Baydenning vitse-prezidentlik davrida yozilgan bir nechta qo‘lyozmalarni olib ketishgan.
Bauerning ta’kidlashicha, Baydenning shaxsiy qarorgohiga kirish prezident jamoasining “jarayonni iloji boricha tezroq o‘tkazish” taklifi bilan amalga oshirilgan; vazirlik advokatlardan tergov harakatlarini oldindan e’lon qilmaslikni so‘ragan. AQSH prezidentining maxsus maslahatchisi Richard Zauberning so‘zlariga ko‘ra, tintuvda davlat rahbari va birinchi xonim Jill Bayden ishtirok etmagan, jarayon advokatlar va Oq uy vakillari bilan birga olib borilgan.
Bu tergovchilar tomonidan topilgan maxfiy hujjatlarning uchinchi partiyasidir. Birinchisi 2022-yil noyabr oyida Penn Biden Center tahlil markazida topilgan. Qog‘ozlar orasida AQSH razvedkasi hisobotlari, Ukraina, Eron va Buyuk Britaniyaga oid brifing materiallari bor edi. Amerika yetakchisi u yerda bunday qog‘ozlarning topilganidan hayratda ekanini bildirdi. Ikkinchi partiya Baydenning Delaverdagi uyi garajidagi ombordan, shuningdek, xonalardan birida topilgan.
Izoh (0)