Isroilda 100 mingdan ortiq odam mamlakatning Benyamin Netanyaxu boshchiligida tuzilgan yangi hukumati siyosatiga qarshi norozilik namoyishiga chiqdi.
21-yanvar, shanba kuni, politsiya hisob-kitoblariga ko‘ra, 110 mingga yaqin odam Tel-Aviv ko‘chalariga chiqdi va bu yangi hukumatga qarshi eng yirik norozilik namoyishiga aylandi. Tashkilotchilar ishtirokchilar sonini 150 ming kishi deb baholagan. Mamlakatning turli shaharlarida, jumladan, Quddus, Hayfa, Beyer-sheve, Gertsliya va Modinda ham minglab odamlar namoyishga chiqdi, deb yozadi The Times of Israel. Bunday aksiyalar Isroilda ketma-ket uchinchi shanba o‘tkazilmoqda.
Olomon qo‘llarida “Demokratiyaning intihosini to‘xtating” yozuvi tushirilgan bannerlar va Netanyaxuning “jinoyatchi” deb yozilgan suratlarini ko‘tarib olgan. Tashkilotchilar “yangi hukumatning islohotlar niqobi ostida Isroil demokratiyasini yo‘q qilishga urinayotganidan” norozi ekanini aytgan.
Xalq sud islohotiga qarshi norozilik bildirmoqda
Dekabr oyi oxirida Isroilda yangi hukumat qasamyod qilgan edi. Bir yarim yil muxolifatda bo‘lganidan so‘ng bosh vazirlik lavozimiga qaytgan Netanyaxu Vazirlar Mahkamasining 33 a’zosini tanishtirdi, ular orasida o‘ngchi natsionalist diniy koalitsiyadan ham vakillar bor.
Adliya vazirligi rahbari Yariv Levin tomonidan taklif qilingan sud-huquq islohoti yangi Vazirlar Mahkamasining eng rezonansli tashabbuslaridan biri bo‘ldi. Uning fikricha, Oliy sudning vakolatlari qonunlar va hukumat qarorlari bilan cheklanadi, Vazirlar Mahkamasi sudyalarni tanlash ustidan nazoratni ham o‘z qo‘liga oladi. Shunday qilib, biror qonun hatto Oliy sud tomonidan mamlakat konstitutsiyasiga zid deb topilsa ham, parlament uni qabul qilish imkoniyatiga ega bo‘ladi.
Izoh (0)