Yangi Zelandiya ta’lim vaziri Kris Xipkins hukmron Leyboristlar partiyasi tomonidan mamlakatning 41-bosh vaziri etib saylandi.
22-yanvar kuni Xipkins hukmron Leyboristlar partiyasining yangi rahbari lavozimiga saylandi. U avvalgi bosh vazir Jasinda Ardernning o‘rniga hukumatni boshqaradi.
Kris Xipkins Arderndan keyin Leyboristlar partiyasi yetakchiligi uchun yagona nomzod edi.
Dunyodagi eng yosh ayol rahbarlardan biri Jasinda Ardern besh yillik faoliyatidan keyin o‘z lavozimini tark etishga qaror qilgandi. U katta mas’uliyatdan charchaganini va bu lavozimga qayta saylanish niyati yo‘qligini aytgan.
“Men uchun vaqt keldi. Yana to‘rt yilga kuchim yetmaydi. Bu hayotimdagi eng mazmunli besh yarim yil bo‘ldi. Ketishimga sabab shuki, bunday o‘ziga xos ish katta mas’uliyatni yuklaydi. Bu shunday mas’uliyatki, yetakchi roliga ayni paytda munosibmisan, yo‘qmi — bilib turishing kerak”, — dedi u o‘zining Leyboristlar partiyasi a’zolariga qarata, shu bilan u o‘z iste’fosi ortida hech qanday yashirin mojaro yo‘qligini bildirdi.
Ardern 2017-yilda 37 yoshida hukumat rahbari etib saylangan edi — u dunyodagi eng yosh ayol rahbarlardan, shuningdek, o‘z lavozimida ishlayotib farzandli bo‘lgan kamdan-kam yuqori mansabdorlardan biri.
Ardern uch yil davom etgan koronavirus pandemiyasi chog‘ida Yangi Zelandiyani boshqargan bo‘lib, uning inqirozni yengib o‘tish bo‘yicha xatti-harakatlari xalqaro hamjamiyat maqtoviga sazovor bo‘ldi.
Izoh (0)