Azur Air aviakompaniyasining O‘zbekistonga yo‘naltirilgan samolyoti bortida xavfli moddalar va portlovchi qurilmalar aniqlanmadi. Bu haqda kompaniya matbuot xizmati xabar bermoqda.
Samolyot Termiz xalqaro aeroporti xavfsizlik xizmati xodimlari tomonidan ko‘zdan kechirilgan.
Eslatib o‘tamiz, Rossiyaning Azur Air aviakompaniyasining Moskvadan Goaga uchayotgan aviareysi havo kemasiga mina joylashtirilgani haqidagi xabarlar tufayli, O‘zbekistonga qayta yo‘naltirilgan edi.
Flightradar24 ma’lumotlariga ko‘ra, u Permdan uchib chiqqan, yakuniy manzil esa Hindistonning Goa shtati bo‘lishi kerak edi.
Hindistonning Dabolim aeroporti direktori havo kemasi portlab ketishi xavfi mavjudligi haqida elektron xat olgan. Bortda 247 kishi, shu jumladan, yetti nafar ekipaj a’zosi bo‘lgan.
Bu Azur Air kompaniyasining Moskva — Goa yo‘nalishidagi reysiga mina joylashtirilgani haqida xabar kelib tushishi bilan bog‘liq so‘nggi bir oy ichidagi ikkinchi holatdir. 9-yanvar kuni Moskvadan Goaga uchayotgan Azur Air samolyoti mina haqidagi xabarlar tufayli Hindistonning Gujarat shtatiga qo‘ngandi. Bort ko‘zdan kechirilganida portlovchi moddalar va shubhali buyumlar topilmagan.
Eslatib o‘tamiz, 13-yanvar kuni Rossiyaning Moskva — Bangkok yo‘nalishidagi reysni amalga oshirayotgan “Aeroflot” aviakompaniyasi samolyoti shoshilinch ravishda Samarqandga qo‘ngan, bunga homilador ayolning salomatligi yomonlashgani, shuningdek, bortda yuzaga kelgan janjal sabab bo‘lgan edi.
18-yanvar kuni esa “Aeroflot” kompaniyasi samolyoti Moskvadan Goaga uchayotgan vaqtida Urganchga qo‘ndirildi. AFL236 yo‘lovchi reysi Goa yo‘nalishi bo‘yicha uchayotgan vaqtda mast holatda zo‘ravonlik qilgan yo‘lovchi sabab Urganch xalqaro aeroportidagi muqobil aerodromga kelib qo‘ngan.
Izoh (0)