AQSH “Vagner” guruhini transmilliy jinoiy tashkilot deb e’lon qiladi

AQSH Moliya vazirligi “Vagner” xususiy harbiy kompaniyasini “transmilliy jinoiy tashkilot” deb tan oladi. Shu munosabat bilan kelasi hafta harbiy kompaniyaga va butun dunyo bo‘ylab unga aloqador guruhlarga qarshi sanksiyalar kengaytiriladi. Bu haqda matbuot uchun brifingda Oq uy raisi Jon Kirbi ma’lum qildi.

“Shu jumladan, jiddiy jinoiy faoliyatini davom ettirayotgani tufayli, ‘Vagner’ guruhi transmintaqaviy xavf tug‘dirishini ushbu xatti-harakatlar tasdiqlaydi”, — deya Reuters amerikalik mansabdorning gaplarini keltirib o‘tdi.

“Vagner” asoschisi Yevgeniy Prigojin Oq uyning bayonotiga o‘z munosabatini bildirdi. “Va nihoyat, endi ‘Vagner’ va amerikaliklar — hamkasblar bo‘ldi. Bundan buyog‘iga o‘zaro munosabatlarimizni ‘jinoiy urug‘-aymoqlar o‘rtasidagi mojaro’ deb atash mumkin”, — dedi biznesmen.

“Vagner” xususiy harbiy kompaniyasi jangchilari rasman Rossiya Mudofaa vazirligiga bo‘ysunmagan holda, Ukrainadagi jangovar harakatlarda faol ishtirok etmoqda. Yollanma jangchilar otryadlari Donbassda ba’zi harbiy yutuqlarga erishgan. Guruhga ko‘ngillilarning ko‘pchiligi Rossiya koloniyalarida yollanmoqda, ularga yarim yil xizmat o‘taganidan keyin afv etilishlarini va’da qilishmoqda. Rossiyada jangchilarni yollash qonun bilan taqiqlangan, shunga qaramay, hukumat vagnerchilar erishgan muvaffaqiyatlarni rasman tan olishni boshlagan, Davlat dumasi esa mamlakatda “Vagner” faoliyatini qonuniylashtirishni taklif qilmoqda.

“Vagner” guruhi o‘zi qanday guruh?

Ko‘plab G‘arb OAVlari “Vagner” guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.

“Konkord” kompaniyasi egasi bo‘lgan Yevgeniy Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan.

U “Vagner”ga aloqadorligini ko‘p marta rad etgan va bunday ayblovlar sababli sudlashgan, ammo 2022-yil sentabrida u “Vagner” asoschisi ekanini ma’lum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan.