Buyuk Britaniya bosh vaziri Rishi Sunak avtomobilda yo‘lovchi o‘rindig‘ida ketayotib, xavfsizlik kamarini taqmagani uchun jarimaga tortildi, deb xabar beradi Sky News. Lankashir grafligi politsiyasi matbuot xizmatining Twitter’ida aytilishicha, jarima 42 yoshli erkak kishiga yozib berilgan.
“Ijtimoiy tarmoqlarda Lankashirda ketayotgan avtomobilda yo‘lovchi o‘rindig‘ida o‘tirib, xavfsizlik kamarini taqmagan odamning videosi tarqaldi, biz bugun (20-yanvar kuni) londonlik 42 yoshli erkakka jarima to‘lash haqida shartli taklif yubordik”, — deyiladi xabarda.
Britaniya hukumati rahbari kanselyariyasida ma’lum qilishlaricha, bu xato mulohaza bo‘lgan, bosh vazir qisqa video olish uchun xavfsizlik kamarini yechgan. “U buning xatolik bo‘lganini to‘liq tan oladi va uzr so‘raydi”, — deya qo‘shimcha qilinadi xabarda.
https://twitter.com/Bad_Journalist2/status/1616044448068308995
Gap Sunak Instagram’ga joylagan video haqida bormoqda. Unda vazir Lankashirni moliyalashtirish hajmi oshirilishi haqida gapirgan. Videoda u xavfsizlik kamarini taqmasdan, yo‘lovchi o‘rindig‘ida o‘tirganini ko‘rish mumkin. Bunday qoidabuzarlik uchun maksimal jarima 500 funt sterling (620 dollar)gacha boradi.
Rishi Sunak Britaniyada jarimaga tortilgan yagona bosh vazir emas. Chunonchi, undan avvalgi hukumat rahbari Boris Jonsonga 2022-yil bahorida pandemiya tufayli joriy qilingan lokdaun vaqtida ziyofatlar uyushtirgani uchun jarima solingan edi. Surishtiruv yakunlariga ko‘ra, turli sanalarda tashkil qilingan sakkizta ziyofat uchun 126 ta jarima yozib berilgan. Jami 83 kishi jarimaga tortilgan, ularning 28 nafariga ikkitadan beshtagacha jarima qo‘llanilgan, Jonsonning o‘zi nechta jarima olganiga aniqlik kiritilmagan. Jarimalarning umumiy summasi ham oshkor qilinmagan.
Izoh (0)