Qirg‘iziston prezidenti aholi uchun elektr energiyasi narxi oshishini e’lon qildi

Qirg‘iziston prezidenti Sadir Japarov aholi uchun elektr energiyasi tariflari oshirilishini e’lon qildi. May oyidan bir kilovatt-soat 77 tiyindan 1 som (0,012 dollar)gacha qimmatlashadi.

Prezident energiya sektoridagi muammolar, xususan, elektr uskunalarining eskirgani, 137 milliard som (1,6 milliard dollar)lik qarz, elektr energiyasi importiga bog‘liqlik va sovuq havo tufayli yuklamalar haqida eslatdi.

“Gapimning oxirida xalqqa murojaat qilmoqchiman. Yuqorida bayon etilganlarning barchasini hisobga olib, shu yilning may oyidan biz elektr energiyasi tarifini 77 tiyindan 1 somgacha ko‘taramiz. Agar bunday qilmasak, o‘z energetika tarmog‘imizni butunlay yo‘qotishimiz mumkin. Chunki bizda ishlab chiqarilayotgan elektr energiyasining 21 tiyinlik tannarxiga energetiklar mehnatiga to‘lash, eskirgan transformatorlar, simlar, simyog‘ochlarni almashtirish uchun xarajatlar qo‘shiladi, oxir-oqibat, 1 kilovatt elektr energiyasi narxi 2 som 38 tiyinga aylanadi”, — deb yozdi prezident.

Japarov energiya sektoridagi bunday vaziyat sabablarini keltirib o‘tdi. Uning aytishicha, sovet davrida elektr energiyasi mo‘l-ko‘l bo‘lgan, u eksport qilingan. “Biroq mustqillik yillarida birorta ham elektr stansiyasi qurilmagan, katta quvvatli transformatorlar va yuqori kuchlanishli simlar yangilanmagan. Asbob-uskunalarning 80 foizdan ortig‘i eskirib ketgan”, — dedi Qirg‘iziston prezidenti.

Shuningdek, aholining bir yarim karra ko‘paygani qayd etildi. 1991-yilda 9 milliard kilovatt-soat iste’mol qilingan bo‘lsa, hozir 16 milliardga yetgan.

Prezidentning aytishicha, so‘nggi 15 yildan buyon qishda mamlakat qo‘shni mamlakatlardan 3 milliard kilovatt-soat energiya sotib olmoqda, u taxminan 5 somdan tushmoqda.

Qirg‘izistonda 1 kilovatt elektr energiyasi 0,77 som turadi (kam ta’minlangan qatlam uchun — 0,5 som). 700 kilovatt limitdan o‘tilsa, 2,16 som to‘lanadi (tog‘li va olis hududlar aholisi uchun limit yo‘q). Shuningdek, o‘tgan yili limitsiz tarif kiritilgan bo‘lib, unga ko‘ra, bir kilovatt 5,04 somga tushadi.

Avvalroq Qirg‘iziston energetika vaziri Taalaybek Ibrayev qishki mavsumga tayyorlanmagani uchun tanqid qilingan edi.

Qirg‘iziston Energetika vazirligi mamlakatda vaqti-vaqti bilan elektr o‘chirilishini ma’lum qilgan. Agar elektr energiyasi uzilmasa, odamlar bir oy davomida elektr ta’minotisiz qolishi mumkinligi, chunki qurilmalarni qayta tiklash zarurligi aytilgan.

12-yanvar kuni Qirg‘izistonda maksimal sutkalik elektr energiyasi iste’moli qayd etildi. Aholidan elektr energiyasini tejash so‘ralgan.