Qirg‘iziston davlat muassasalarini qirg‘iz tiliga o‘tkazadi

Qirg‘iziston parlamenti davlat tili to‘g‘risidagi qonun loyihasini birinchi o‘qishda qabul qildi, deb xabar beradi “Azattik unalgisi”.

Qonun loyihasining maqsadi davlat tilini qo‘llashning huquqiy asoslarini o‘rnatish va til siyosatini amalga oshirishdan iborat. Endi qirg‘iz tili davlat organlari uchun ishchi tilga aylanadi.

Ushbu hujjatda aytilishicha, Qirg‘izistonda davlat hokimiyati “davlat tilida, zarur hollarda esa rasmiy tilda” ishlashi kerak”.

Davlat muassasalarida zarurat yuzaga kelgan taqdirda ishchilar boshqa tillardan foydalanishi mumkin.

Qirg‘iziston parlamentiga, shuningdek, qirg‘iz alifbosi va orfoepiya qoidalarini tasdiqlash huquqini berish taklif etilmoqda.

Bundan tashqari, toponimik nomlarni davlat tilida rasmiylashtirib, ularni rasmiy hujjatlarda va OAVlarda transliteratsiya yordamida ifodalash taklif qilinmoqda.

Rus tili Qirg‘izistonda rasmiy maqomga ega bo‘lib, aholining qariyb yarmi shu tilda so‘zlashadi.

Avvalroq Qirg‘iziston prezidenti Sadir Japarov amaldorlarni rus tilida hujjat yuritayotgani uchun tanqid qilgan edi. Japarovning ta’kidlashicha, qirg‘iz davlat xizmatchilari hujjatlarni faqat rus tilida yuritishi noto‘g‘ri. “Hujjat yuritishda davlat tilining ulushi kamida 50 foizni tashkil etishi kerak”, — dedi prezident.