Berlin uchun Ukrainaga tank yetkazib berish AQSH ham shunday qilgan taqdirdagina osonroq bo‘ladi, bunga sabab — Germaniyaning o‘tmishi. Bu haqda Germaniya vitse-kansleri, iqtisodiyot va iqlim vaziri Robert Xabekka tayanib, Bloomberg xabar berdi.
“Bizning tariximizni yaxshi bilasiz, biz muayyan sabablarga ko‘ra, bu narsalarni (harbiy texnika yetkazib berishni) boshqalarga qaraganda ko‘proq istamaymiz”, — deb tushuntirdi Xabek.
Shu bilan birga, Oq uy Germaniyaning pozitsiyasida mantiq ko‘rmayapti, chunki nemis Leopard tanklari Ukrainaga Amerikaning Abrams tanklaridan ertaroq yetib borishi mumkin, Ukraina harbiylari esa ularni qanday boshqarishni tezroq o‘rganadi, dedi Bloomberg’ning AQSH prezidenti ma’muriyatidagi manbalari.
“Ular bizni qiyin ahvolga solib qo‘yishdi”, — dedi Bayden ma’muriyatining yuqori martabali amaldori CNN nashriga. Uning fikricha, Berlin o‘z pozitsiyasini o‘zgartiradiganga o‘xshamayapti.
18-yanvar, chorshanba kuni Davosda bo‘lib o‘tgan Jahon iqtisodiy forumi doirasida Germaniya kansleri Olaf Shols ham tanklar borasida shunday pozitsiyani bildirgandi. U AQSH kongressmenlarini AQSH tanklarini Germaniya bilan bir vaqtda yuborishga chaqirdi. Shols o‘z sharti haqida AQSH prezidenti Jo Bayden bilan suhbatda gapirgan, biroq Bayden Abrams tanklarini Ukrainaga yuborish niyatini tasdiqlamagan.
AQSH hukumati og‘ir Abrams tanklarini (og‘irligi 55 tonna) texnik sabablarga ko‘ra Kiyevga yuborishni ma’qullamayapti — tanklarning gaz turbinali dvigatellari juda katta miqdorda yonilg‘i sarflaydi, buzilishlarga moyil va ularga texnik xizmat ko‘rsatish uchun yuqori malakali xodimlar kerak. Oq uyning ta’kidlashicha, ularga xizmat ko‘rsatish narxi juda yuqori.
Izoh (0)