O‘zbekistonda xizmat ko‘rsatgan artist Xosiyat Husanova 20-yanvar kuni 54 yoshni qarshiladi. Ijodda o‘z o‘rnini topish uchun ko‘plab qiyinchiliklarni boshidan kechirgan aktrisaning hayoti haqida qiziqarli ma’lumotlar bilan tanishtiramiz.
“Imtihondan o‘tsang, artist bo‘lasan, yo‘qsa ketmon chopasan”
Aktrisa oddiy ishchi oilasida dunyoga kelgan. Garchi oilasida san’atkorlar bo‘lmasa-da, otasi uni bolalikdan “artist qizim” deb erkalagan. Chunki u bolalikdan raqs tushish va qo‘shiq aytishga qiziqqan. Maktabni tamomlagandan keyin otasi uning san’at oliygohiga o‘qishga kirishiga ruxsat bergan. “Faqatgina bu yil o‘qishga topshirasan, kirsang o‘qiysan, bo‘lmasa Andijonga borib, katta ketmonni qo‘lga olasan”, deya shart qo‘ygan. Aktrisa bu gapdan keyin institutga o‘qishga kirish uchun astoydil mehnat qilgan va ijodiy imtihonlardan yuqori ball to‘plagan.
1990-yil institutni tamomlab, Andijondagi musiqali drama teatriga ishga borgan. Ammo u yerda o‘z o‘rnini topolmagan. “Men Hamza teatrida ishlashni orzu qilardim. Shu bois Andijondagi musiqali teatrga mehrimni berolmadim”, deydi aktrisa.
“So‘z beraman, semirmayman, ishga oling”
U paytda O‘zbek milliy akademik drama teatriga Yoqub Ahmedov rahbarlik qilardi. Qabuliga kirib, ishga kirish niyatim borligi haqida aytib turganimda Yodgor Sa’diyev kirib kelgan. Suhbat chog‘ida Yoqub aka teatrga ishga kirmoqchi ekanligimni aytgan. Yodgor aka menga qarab, “Bichimi kichkinagina qiz ekan, ammo bular 1-2 yil ishlab darrov turmushga chiqib ketadi. Keyin bolali bo‘lganidan keyin, semirib ketadi”, degan. O‘shanda Yoqub akaga: “So‘z beraman, semirib ketmayman, meni ishga olinglar”, deb iltimos qilgan.Aktrisa ishga qabul qilingan kunning uchinchi kunidan boshlab “Afandining besh xotini” spektaklida rol ijro etgan.
“Axlatxonadagi nonlarni yedim”
Aktrisa 1996-yil turmushga chiqqan, ammo bu turmush unga baxt keltirmadi. Sababi turmush o‘rtog‘i ko‘p o‘tmay ozodlikdan mahrum etilgan. Xosiyat Husanova chaqalog‘i bilan yosh ijodkorlar yotoqxonasida qolib ketgan.
— Moddiy jihatdan juda qiynalganman. Uydagilardan yordam so‘rashga uyalib, och qolib ketgan kunlarim ham bo‘lgan. Bir kuni yeyishga nonim ham qolmagan. Yotoqxonada eskirgan nonlarni axlatxonadagi alohida idishga tashlab qo‘yishardi. Odamlar ko‘rib qolmasin, deb yarim kechasi 2:00 da nonlardan bir necha bo‘lagini olganman. Xonaga olib kirib, ularni yegandim, — deydi Xosiyat Husanova.
Hayotidagi mudhish avtofalokat
Aktrisa Xosiyat Husanova 2008-yili jiddiy avtofalokatga uchragan. O‘shanda uning yuzi tanib bo‘lmas darajaga kelgani, hatto shoshilinch yordam bilan kasalxonaga olib borishganida avvaliga uni tanishmagani haqida intervyularida aytgan. Shifokorlar aktrisaga kuchli miya chayqalishi va umurtqa pog‘onasining jiddiy shikastlanishi tashxisini qo‘yishgan. Aktrisa avariyadan so‘ng xotirasi va eshitish qobiliyati ancha yomonlashganini aytadi.
“Sahnada oyoqlarim o‘zimga bo‘ysunmay qolgan”
Ammo bu qiyinchiliklarning so‘nggisi emasdi. Avtofalokatdan so‘ng bir necha oy davolanib ishga qaytgan aktrisa ko‘p o‘tmay sog‘lig‘i yomonlashayotganini payqaydi. Avvaliga bo‘yni, undan so‘ng umurtqasi og‘riydi. Hatto “O‘tgan kunlar” spektakli namoyish etilayotganda oyoqlari o‘ziga bo‘ysunmayotganini sezadi.
— Sahnada rol ijro etayotganda oyog‘im va bo‘ynim qaqshab og‘rirdi. Musiqa balandlashgan paytda sahna ortiga o‘tib, “dod” deb baqirardim. Og‘riqning azobiga chidolmay, kechasi bilan yig‘lab chiqardim. Shifokorlar umurtqada o‘simta borligini va uni faqat jarrohlik yo‘li bilan olib tashlash mumkinligini aytishdi, — deydi aktrisa Xosiyat Husanova.
O‘zbek shifokorlariga ishonmay qo‘ygan aktrisa jarrohlik amaliyotini xorijda o‘tkazishni rejalashtirdi. Ammo kutilmaganda umurtqasi shishib, og‘riq yanada zo‘raydi. Shifokorlar 3 kun ichida jarrohlik amaliyoti o‘tkazilmasa, kech bo‘lishini aytishdi. Amaliyot kutilganidan ham a’lo darajada o‘tdi va uning hayoti saqlab qolindi.
“Farzandli bo‘lishimga qarshi bo‘lishdi”
Aktrisa xastalikka chalingan paytida mabodo vafot etsa, qizi yolg‘izlanib qolishi haqida ko‘p o‘ylaydi. Shundan so‘ng shifokorlarning qarshi bo‘lishiga qaramay, homilador bo‘ladi. O‘sha paytda aktrisa 47 yoshda bo‘lib, 18 yildan so‘ng o‘g‘li Imronni dunyoga keltiradi.
— Shifokorlar o‘g‘limni dunyoga keltirishimga jiddiy qarshilik qilishgan. Tavakkal — peshonada borini ko‘raman, deganman. Qo‘rqitishlarning asosiy sababi faqatgina yoshim bilan bog‘liq emas, balki 2008-yil dahshatli avtofalokatga uchraganim bo‘lgan. Avariyada tos suyaklarim butkul maydalanib, oyoq sonlarim ikkiga bo‘linib, yuzimning yarmi yo‘q bo‘lib ketgandi. Ikki yil to‘shakka mixlanib, o‘z hojatimga ham yaramay qolgandim. Xullas, shu sabab shifokorlar homilador bo‘lishimga qarshi bo‘lishgan.To‘shakka mixlanib qolganimda qizimning yolg‘izligini his qilganman. Baribir insonga jigar kerak ekan, deb Allohdan Imronbekni tilab olganman, — deydi aktrisa Xosiyat Husanova.
“Qizingizni o‘g‘irlab ketaman”
Aktrisa qizi Mohlaroyimni yosh aktyor Jahongir Teshaboyevga turmushga bergan. Aktyor intervyularining birida Mohlaroyim bilan tanishganida u mashhur aktrisaning qizi ekanligini bilmagani haqida so‘zlab bergandi.
— Ayolim onasiga umuman o‘xshamaydi. Qaynonam sho‘x-shodon, ayolim esa nihoyatda uyatchan. Birga intervyularga chaqirishsa ham bormaydi. U bilan tanishganimda O‘zbekiston davlat Jahon tillari universitetida tahsil olardi. Ancha vaqtgacha onasining aktrisa ekanligini aytmagan. Sovchilar kelayotganini eshitganimdan keyin qaynonamning yoniga borib: “Bersangiz qizingizni faqat menga berasiz, bo‘lmasa olib qochib ketaman”, deganman. U paytda “Qadam” seriali hali efirga uzatilmagandi. Qaynonam avvaliga biroz ikkilangan, ammo niyatim jiddiy ekanligini bilib, qizini menga turmushga bergan, — deydi aktyor Jahongir Teshaboyev.
Xosiyat Husanova nafaqat tomoshabinlarning sevimli aktrisasi, farzandlari va nabirasining sevimli buvijonisi ham hisoblanadi.
“Teatr sahnasida kechgan 28 yil”
Aktrisa 1995-yildan buyon O‘zbek milliy akademik drama teatrida faoliyat yuritadi. U qator spektakllarda katta-kichik rollarni ijro etgan. Xususan, “Omonot dunyo”da Latofat, “Antiqa qudalar”da O‘g‘iloy, “Uch kunlik dunyo”da Anora, “Oltin qiz”da Barno kabi rollarni ijro etgan. Aktrisa ishtirokidagi filmlar ham tomoshabinlar tomonidan iliq qarshi olingan.
Jahongir Ahmedov rejissorligida “Tilim qursin” filmi kutilganidan ham ko‘proq mashhurlikka erishgan. Xosiyat Husanovaning filmning ilk qismida suratga tushmagan. “Tilim qursin-2”dagi roli esa o‘ziga xos.
Aktrisa Zulfiqor Musoqovning “Novda” filmida quvnoq sovchi rolini ham qoyilmaqom ijro etgan. Negadir, u davlat buyurtmasiga ko‘ra suratga olinadigan filmlarda kamdan kam suratga tushadi.
Aktrisa Javlon Shodmonovning ko‘plab filmlarida suratga tushgan. Xususan, “Hasan ibn Husan” filmida ham komik rollardan birini ijro etgan.
Mavzuga doir:
Izoh (0)