Ўзбекистонда хизмат кўрсатган артист Хосият Ҳусанова 20 январь куни 54 ёшни қаршилади. Ижодда ўз ўрнини топиш учун кўплаб қийинчиликларни бошидан кечирган актрисанинг ҳаёти ҳақида қизиқарли маълумотлар билан таништирамиз.
«Имтиҳондан ўтсанг, артист бўласан, йўқса кетмон чопасан»
Актриса оддий ишчи оиласида дунёга келган. Гарчи оиласида санъаткорлар бўлмаса-да, отаси уни болаликдан «артист қизим» деб эркалаган. Чунки у болаликдан рақс тушиш ва қўшиқ айтишга қизиққан. Мактабни тамомлагандан кейин отаси унинг санъат олийгоҳига ўқишга киришига рухсат берган. «Фақатгина бу йил ўқишга топширасан, кирсанг ўқийсан, бўлмаса Андижонга бориб, катта кетмонни қўлга оласан», дея шарт қўйган. Актриса бу гапдан кейин институтга ўқишга кириш учун астойдил меҳнат қилган ва ижодий имтиҳонлардан юқори балл тўплаган.
1990 йил институтни тамомлаб, Андижондаги мусиқали драма театрига ишга борган. Аммо у ерда ўз ўрнини тополмаган. «Мен Ҳамза театрида ишлашни орзу қилардим. Шу боис Андижондаги мусиқали театрга меҳримни беролмадим», дейди актриса.
«Сўз бераман, семирмайман, ишга олинг»
У пайтда Ўзбек миллий академик драма театрига Ёқуб Аҳмедов раҳбарлик қиларди. Қабулига кириб, ишга кириш ниятим борлиги ҳақида айтиб турганимда Ёдгор Саъдиев кириб келган. Суҳбат чоғида Ёқуб ака театрга ишга кирмоқчи эканлигимни айтган. Ёдгор ака менга қараб, «Бичими кичкинагина қиз экан, аммо булар 1-2 йил ишлаб дарров турмушга чиқиб кетади. Кейин болали бўлганидан кейин, семириб кетади», деган. Ўшанда Ёқуб акага: «Сўз бераман, семириб кетмайман, мени ишга олинглар», деб илтимос қилган.Актриса ишга қабул қилинган куннинг учинчи кунидан бошлаб «Афандининг беш хотини» спектаклида рол ижро этган.
«Ахлатхонадаги нонларни едим»
Актриса 1996 йил турмушга чиққан, аммо бу турмуш унга бахт келтирмади. Сабаби турмуш ўртоғи кўп ўтмай озодликдан маҳрум этилган. Хосият Ҳусанова чақалоғи билан ёш ижодкорлар ётоқхонасида қолиб кетган.
— Моддий жиҳатдан жуда қийналганман. Уйдагилардан ёрдам сўрашга уялиб, оч қолиб кетган кунларим ҳам бўлган. Бир куни ейишга ноним ҳам қолмаган. Ётоқхонада эскирган нонларни ахлатхонадаги алоҳида идишга ташлаб қўйишарди. Одамлар кўриб қолмасин, деб ярим кечаси 2:00 да нонлардан бир неча бўлагини олганман. Хонага олиб кириб, уларни егандим, — дейди Хосият Ҳусанова.
Ҳаётидаги мудҳиш автофалокат
Актриса Хосият Ҳусанова 2008 йили жиддий автофалокатга учраган. Ўшанда унинг юзи таниб бўлмас даражага келгани, ҳатто шошилинч ёрдам билан касалхонага олиб боришганида аввалига уни танишмагани ҳақида интервьюларида айтган. Шифокорлар актрисага кучли мия чайқалиши ва умуртқа поғонасининг жиддий шикастланиши ташхисини қўйишган. Актриса авариядан сўнг хотираси ва эшитиш қобилияти анча ёмонлашганини айтади.
«Саҳнада оёқларим ўзимга бўйсунмай қолган»
Аммо бу қийинчиликларнинг сўнггиси эмасди. Автофалокатдан сўнг бир неча ой даволаниб ишга қайтган актриса кўп ўтмай соғлиғи ёмонлашаётганини пайқайди. Аввалига бўйни, ундан сўнг умуртқаси оғрийди. Ҳатто «Ўтган кунлар» спектакли намойиш этилаётганда оёқлари ўзига бўйсунмаётганини сезади.
— Саҳнада рол ижро этаётганда оёғим ва бўйним қақшаб оғрирди. Мусиқа баландлашган пайтда саҳна ортига ўтиб, «дод» деб бақирардим. Оғриқнинг азобига чидолмай, кечаси билан йиғлаб чиқардим. Шифокорлар умуртқада ўсимта борлигини ва уни фақат жарроҳлик йўли билан олиб ташлаш мумкинлигини айтишди, — дейди актриса Хосият Ҳусанова.
Ўзбек шифокорларига ишонмай қўйган актриса жарроҳлик амалиётини хорижда ўтказишни режалаштирди. Аммо кутилмаганда умуртқаси шишиб, оғриқ янада зўрайди. Шифокорлар 3 кун ичида жарроҳлик амалиёти ўтказилмаса, кеч бўлишини айтишди. Амалиёт кутилганидан ҳам аъло даражада ўтди ва унинг ҳаёти сақлаб қолинди.
«Фарзандли бўлишимга қарши бўлишди»
Актриса хасталикка чалинган пайтида мабодо вафот этса, қизи ёлғизланиб қолиши ҳақида кўп ўйлайди. Шундан сўнг шифокорларнинг қарши бўлишига қарамай, ҳомиладор бўлади. Ўша пайтда актриса 47 ёшда бўлиб, 18 йилдан сўнг ўғли Имронни дунёга келтиради.
— Шифокорлар ўғлимни дунёга келтиришимга жиддий қаршилик қилишган. Таваккал — пешонада борини кўраман, деганман. Қўрқитишларнинг асосий сабаби фақатгина ёшим билан боғлиқ эмас, балки 2008 йил даҳшатли автофалокатга учраганим бўлган. Аварияда тос суякларим буткул майдаланиб, оёқ сонларим иккига бўлиниб, юзимнинг ярми йўқ бўлиб кетганди. Икки йил тўшакка михланиб, ўз ҳожатимга ҳам ярамай қолгандим. Хуллас, шу сабаб шифокорлар ҳомиладор бўлишимга қарши бўлишган.Тўшакка михланиб қолганимда қизимнинг ёлғизлигини ҳис қилганман. Барибир инсонга жигар керак экан, деб Аллоҳдан Имронбекни тилаб олганман, — дейди актриса Хосият Ҳусанова.
«Қизингизни ўғирлаб кетаман»
Актриса қизи Моҳларойимни ёш актёр Жаҳонгир Тешабоевга турмушга берган. Актёр интервьюларининг бирида Моҳларойим билан танишганида у машҳур актрисанинг қизи эканлигини билмагани ҳақида сўзлаб берганди.
— Аёлим онасига умуман ўхшамайди. Қайнонам шўх-шодон, аёлим эса ниҳоятда уятчан. Бирга интервьюларга чақиришса ҳам бормайди. У билан танишганимда Ўзбекистон давлат Жаҳон тиллари университетида таҳсил оларди. Анча вақтгача онасининг актриса эканлигини айтмаган. Совчилар келаётганини эшитганимдан кейин қайнонамнинг ёнига бориб: «Берсангиз қизингизни фақат менга берасиз, бўлмаса олиб қочиб кетаман», деганман. У пайтда «Қадам» сериали ҳали эфирга узатилмаганди. Қайнонам аввалига бироз иккиланган, аммо ниятим жиддий эканлигини билиб, қизини менга турмушга берган, — дейди актёр Жаҳонгир Тешабоев.
Хосият Ҳусанова нафақат томошабинларнинг севимли актрисаси, фарзандлари ва набирасининг севимли бувижониси ҳам ҳисобланади.
«Театр саҳнасида кечган 28 йил»
Актриса 1995 йилдан буён Ўзбек миллий академик драма театрида фаолият юритади. У қатор спектаклларда катта-кичик ролларни ижро этган. Хусусан, «Омонот дунё»да Латофат, «Антиқа қудалар»да Ўғилой, «Уч кунлик дунё»да Анора, «Олтин қиз»да Барно каби ролларни ижро этган. Актриса иштирокидаги фильмлар ҳам томошабинлар томонидан илиқ қарши олинган.
Жаҳонгир Аҳмедов режиссёрлигида «Тилим қурсин» фильми кутилганидан ҳам кўпроқ машҳурликка эришган. Хосият Ҳусанованинг фильмнинг илк қисмида суратга тушмаган. «Тилим қурсин-2»даги роли эса ўзига хос.
Актриса Зулфиқор Мусоқовнинг «Новда» фильмида қувноқ совчи ролини ҳам қойилмақом ижро этган. Негадир, у давлат буюртмасига кўра суратга олинадиган фильмларда камдан кам суратга тушади.
Актриса Жавлон Шодмоновнинг кўплаб фильмларида суратга тушган. Хусусан, «Ҳасан ибн Ҳусан» фильмида ҳам комик роллардан бирини ижро этган.
Мавзуга доир:
Изоҳ (0)