2022-yil dekabr oyida 54 yoshni qarshilagan avstraliyalik aktyor bolaligidagi psixologik travma tufayli terapiya olishini tan oldi. “Bu menga yaxshi yordam berdi, — deydi aktyor. — Aslida hammamiz qo‘llab-quvvatlashga muhtojmiz”.
Jekmanning qo‘shimcha qilishicha, mashg‘ulotlar unga o‘tmish bilan kelishishga va yaqinlari bilan yaxshiroq muloqot qilishga yordam beradi: “Eng muhimi, terapiya yaqinlarim bilan munosabatlarimga yordam beradi, meni chinakam tushunishga va o‘zimni ularning o‘rniga qo‘yishga o‘rgatadi”.
Bolaligida aktyor onasidan ajralishiga majbur bo‘ladi. Uning onasi Greys to‘satdan eri va 5 farzandini Avstraliyada qoldirib, vatani Angliyaga qaytganida Xyu 8 yoshda edi. Bu haqda oila telegramma orqali xabar topadi. Aktyor buni shunday eslaydi: “Bu juda og‘ir zarba bo‘ldi. Men u qaytib kelishi mumkin deb o‘yladim, ammo unday bo‘lmadi”.
Faqat 12 yoki 13 yoshga kelibgina Xyu onasi endi qaytib kelmasligini tushunadi: “Dadam uni qaytarish uchun Angliyaga bordi, lekin o‘sha paytda onam boshqa erkak bilan turmush qurgan, bolasi bor edi, — deydi aktyor. — Dadam qaytib kelganida, men hammasini tushundim. Men allaqachon hech narsa yordam bermasligini anglaydigan yoshda edim”.
Ota-onasi ajrashgandan so‘ng, aktyorning 2 opasi onasi bilan birga ketadi, Xyuning o‘zi esa 2 akasi bilan otasi yonida qoladi. Xyu oiladagi eng kichigi edi. Onasini yiliga bir marta ko‘rardi xolos.
Bo‘lgan voqealarga qaramay, Jekman u va onasi o‘rtasida aloqa borligiga hech qachon shubha qilmagan. “Bilaman, bu g‘alati tuyulishi mumkin, lekin onam meni sevmasligini hech qachon his qilmaganman, — deb tan oladi avstraliyalik aktyor. — Men u bilan bu haqda ko‘p gaplashganman, endi esa o‘shanda u o‘zi uchun kurashganini tushunaman”.
Aktyorning so‘zlariga ko‘ra, onasi uchun Angliyadan Avstraliyaga ko‘chib o‘tish qiyin bo‘lgan. Xyu dunyoga kelgach, tug‘uruqdan keyingi og‘ir depressiya tufayli uzoq vaqt kasalxonada yotadi. Depressiya ko‘p yillar davom etadi, Greys ba’zan qisqa muddatga uydan chiqib ketar, o‘zini tuzoqqa tushib qolgandek his qilardi.
2011-yilda Xyu intervyusida shunday degandi: “Katta bo‘lganim sari onam nima uchun ketganini tushundim. Hozir 43 yoshdaman, eng muhimi, biz yarashib oldik”.
Jekman hozirda onasi bilan yaxshi munosabatda. U muntazam ravishda ijtimoiy tarmoqlarda uni onalar kuni va tug‘ilgan kuni bilan tabriklaydi.
Ular birga ovqat pishirishni yaxshi ko‘radi — Greys o‘z retseptlarini o‘g‘li bilan baham ko‘radi. Ushbu retseptning fotosuratida ona o‘g‘lini mehr bilan Hyubi deb chaqirayotganini ko‘rish mumkin.
Jekman — namunali oila boshlig‘i, u “Korrelli” teleserialini suratga olish paytida tanishgan aktrisa Deborra-Li Furness bilan 26 yildan beri baxtli yashamoqda.
Hozirda er-xotinning ikki nafar farzandi bor, ularni Furnessning homilador bo‘lishga urinishlari muvaffaqiyatsiz tugaganidan so‘ng, asrab olishgan. “Qizim va xotinim uchun hayot bu — zavq bag‘ishlaydigan katta shved stoli. Qizim juda kirishimli, lekin o‘g‘lim unday emas. U paparatssilarni yomon ko‘radi, qizim esa aksincha”.
Shuningdek, aktyor bolalarni o‘zlariga ishonishga o‘rgatish juda muhimligini ham qo‘shimcha qiladi.
Izoh (0)