O‘zbek kino olamining taniqli aktyorlaridan biri Adiz Rajabov 6-yanvar kuni 39 yoshni qarshi oldi. Ushbu sana munosabati bilan aktyor ishtirokidagi eng muvaffaqiyatli filmlar haqida so‘z yuritamiz.
Buxoroda tug‘ilgan yulduz
Adiz Rajabov 1984-yilning 6-yanvarida Buxoro viloyatida tavallud topgan. Adiz maktabni tugatgach O‘zbekiston davlat san’at va madaniyat institutida aktyorlik bo‘yicha tahsil oladi. 2005-yilda “Nahotki sen” filmida ilk debyut rolini ijro etadi. 2006-yilda rejissor Sohib Abbosxon tomonidan “Sen meni sevasanmi?” filmi suratga olinib, bu filmdagi roli Rajabovga katta e’tirof keltiradi.
Bugunga qadar Adiz Rajabov 35 dan ortiq film va seriallarda turli rollarni ijro etgan. Ayni paytda “Diydor” teatr studiyasida faoliyat olib borayotgan aktyor o‘zining Instagram sahifasida 1,5 milliondan ziyod obunachiga ega. Quyida Adiz Rajabov rol ijro etgan filmlar bilan qisqacha tanishing.
“Bo‘rilar”
Aktyor 2007-yilda Zebo Navro‘zova rejissorligida suratga olingan “Bo‘rilar” filmida rol ijro etadi. Ushbu filmda Adiz Rajabov salbiy qahramon obrazini mahoratli tarzda ochib bergani sabab ko‘p sonli muxlislar orttiradi.
“Super kelinchak”
“Bo‘rilar” kinokartinasidan so‘ng Adiz Rajabov komedik rolga qo‘l uradi. 2008-yilda suratga olingan “Super kelinchak” filmida aktrisa Diana Yagofarova bilan birga ijro etgan bosh roli uning iqtidorli aktyor sifatida elga tanilishiga sabab bo‘ldi. Filmda Saida Rametova qaynona obrazini gavdalantirgan bo‘lsa, Adiz Rajabov uning o‘g‘li Sardor obrazida ekranga chiqqan.
“Poyma-poy”
Boy oilada voyaga yetgan shaharlik olifta yigit o‘z uyida xizmat qilayotgan oilaning qizini sevib qoladi. Ota-onalar bu nikohga qarshi bo‘lsa-da, yoshlar bu qarshilikka qaramay turmush quradi. Birgalikda mustaqil hayot kechira boshlaydilar. O‘ziga to‘q ulg‘aygan yigit uchun oddiy kundalik qiyinchiliklarni yengib o‘tish oson bo‘lmaydi. Ketma-ket baxtsizliklar qahramonlarni ayovsiz sinaydi. “Poyma-poy” filmi shunday sujet bilan boshlanadi. Filmda Adiz Shohrux obrazida mahoratli aktrisa Sevara Soliyeva bilan birga bosh rolni ijro etadi.
“O‘zimdan o‘zimgacha”
2009-yilda Abduvohid G‘aniyev “O‘zimdan o‘zimgacha” filmini suratga olgan. Mazkur filmda Davron va Narimon ismli qiyofadosh, ammo bir-biriga qarama qarshi ikki personaj rolini aktyor Adiz Rajabov ijro etgan. Ota-onasining qistovi sabab uylangan Davron to‘yi kuni uyidan qochib ketadi. U chekka qishloqqa yetganida ehtiyotsizligi sabab cho‘pon Narimonni urib yuboradi. U qonga belangan qiyofadoshini ko‘rib, qo‘rqib ketadi va mashinasini tashlab qochadi.
Cho‘ponni qimmatbaho mashinaning yonida ko‘rganlar uni Davron deb o‘ylab, oila a’zolariga qo‘ng‘iroq qilishadi. Shu voqeadan so‘ng Narimon shaharga, badavlat oila a’zolari davrasiga ketadi. Davron esa qishloqda qolib cho‘ponlik qiladi. Film yakunida Davronga unashtirilgan qiz Narimonni sevib qoladi. Qishloqdagi qiz esa shaharlik Davronga ko‘ngil qo‘yadi.
“Qalb ko‘zi”
2010-yilda suratga olingan bu filmda Adiz ustoz aktyorlar Ubaydulla Omon, Gulchehra Sa’dullayeva, Erkin Komilovlar bilan birga rol ijro etishga muvaffaq bo‘ladi. Shu bilan birga filmda Shahzoda Matchonova, Asal Shodiyeva, Samandar Hamroqulovlarni ham turli obrazlarda ko‘rish mumkin. Adiz ushbu kinokartinada salbiy qahramon obrazida, ya’ni sevgisiga xiyonat qilgan vafosiz yigit qiyofasida namoyon bo‘ladi.
“Salom sevgi, xayr sevgi”
2012-yilda suratga olingan “Salom sevgi, xayr sevgi” filmida Adiz Rajabov autizm bilan tug‘ilib, voyaga yetgan yigit — Baxtiyor rolini ijro etadi. Aqliy va ruhiy holatlarni ochib berish uchun aktyor uzoq tayyorgarlik ko‘rgani uning obrazini mahorat bilan aks ettirganida ham yaqqol nomoyon bo‘ladi. Garchi autizm sindromi tuzalmagan bo‘lsa-da, u mohir arxitektor bo‘lib yetishadi. Biroq u bolalikdagi do‘sti va keyinchalik sevgilisiga aylangan Senzoraning ota-onasi tomonidan rad etiladi. Bu esa yigitning ruhiy zo‘riqishiga, onasining chuqur qayg‘usiga sabab bo‘ladi. Filmda Adizning aktyorlik mahorati darhol ko‘zga tashlanadi.
“Uchar qiz”
Yolqin To‘ychiyevning ushbu komedik-fantastik filmi Yer sayyorasiga qanotlarida uchib tushgan g‘ayrioddiy qiz haqida. U boshqa sayyoradan noma’lum sabablarga ko‘ra uchib kelgan. Uchar qiz bosh qahramonimiz yashaydigan o‘zbek qishloqlaridan biriga qo‘nishga qaror qiladi. O‘zga sayyoradan uchib kelgan qiz obrazida Asal Shodiyeva, ixtirochilikni va g‘ayrioddiy narsalarni o‘ylab topishni yaxshi ko‘radigan yigit obrazida Adiz Rajabov hamda uning ota-onasi qiyofasida aktyorlar Farhod Abdullayev va Saida Rametovalarni ko‘rish mumkin.
“To‘qlikka sho‘xlik”
2013-yilda katta ekranlarda namoyish etilgan bu filmda Adiz Rajabov o‘ziga to‘q oilaning farzandi Alisher rolini ijro etgan. Xotini Laylo obrazida Shahzoda Matchonova onasining gapiga kirib o‘z oilasini barbod qilishgacha boradi. Oqibatda risoladagidek oila parokanda bo‘ladi. Filmda Matyoqub Matchonov, Barno Qodirova, Baxtiyor Qosimov, Muyassar Berdiqulovalar ota-ona qudalar rolida namoyon bo‘ladi.
“Farzandim”
2011-yilda melodrama janrida suratga olingan “Farzandim” filmi tomoshabinlarning sevimli kinosiga aylanib ulgurdi. Elyor Hoshimov rejissorligida yaratilgan bu filmda Adiz Rajabov fotograf Dilshod, Dilnoza Kubayeva Nasiba rolida bir-biriga nihoyatda muhabbatli juftlik rolini qoyilmaqom tarzda ijro etgan. Ammo bu oila 10 yillarki farzandsizlik dog‘ida qiynaladi. Nihoyat, Nasiba turmush o‘rtog‘ining yana bir bor oila qurishiga rozilik berganida o‘zi ham farzand kutayotgani haqida xabar topadi. Farzandini dunyoga keltiradi-yu, Nasiba dunyodan ko‘z yumadi. Bu filmning uzviy davomi sifatida “Farzandim-2” suratga olinadi. O‘z farzandi o‘gay ona qo‘lida ayovsiz qiynoqlar ostida qoladi, otaning esa bundan aslo xabari bo‘lmaydi. Ikkinchi film ham muvaffaqiyatli tarzda shuhrat qozonadi.
“Sarvqomat dilbarim”
2018-yilda “O‘zbekkino” milliy agentligi Qirg‘iziston Respublikasi bilan hamkorlikda “Sarvqomat dilbarim” nomli qo‘shma filmni suratga oladi. Film yozuvchi Chingiz Aytmatov tavalludining 90 yilligiga bag‘ishlanib, unda o‘zbek-qirg‘iz akyorlar guruhi ishtirok etadi. Sarvar Karimov rejissorligida olingan filmda bosh rollarni Adiz Rajabov hamda qirg‘izistonlik aktrisa Madina Talipbek gavdalantiradi. Film haydovchi yigit Rustamning qizil durracha o‘ragan qishloqlik bir qizni sevib qolgani, unga ota-onasining roziligisiz uylangani va unga qilgan xiyonatlari, afsus va armonlari haqida. Adiz bu filmda Rustam obrazida namoyon bo‘ladi.
“Hamroh”
2017-yilda katta ekranlarga chiqqan film Buxoro shahri, Jizzax viloyati va Toshkent shahrida suratga olingan. Film 45 kun ichida suratga olingan bo‘lib, tayyorgarlik ishlari uchun 75 kun vaqt sarflangan. Film triller, drama janrida suratga olingan.
Filmda Karim Mirxodiyev, Lola Eltoyeva, Adiz Rajabov, Yulduz Rajabova, Umid Iskandarov, Bobur Yo‘ldoshev, Nafosat Shodiyeva singari aktyor, aktrisalar jamoasi yig‘ilgan.Mavzuga doir: Ozodbek Nazarbekov aktyorlar — Alisher Uzoqov va Adiz Rajabovning “Mendirman Jaloliddin” serialida rol ijro etmagani sababini aytdi
Izoh (0)