Берлин учун Украинага танк етказиб бериш АҚШ ҳам шундай қилган тақдирдагина осонроқ бўлади, бунга сабаб — Германиянинг ўтмиши. Бу ҳақда Германия вице-канцлери, иқтисодиёт ва иқлим вазири Роберт Хабекка таяниб, Bloomberg хабар берди.
«Бизнинг тарихимизни яхши биласиз, биз муайян сабабларга кўра, бу нарсаларни (ҳарбий техника етказиб беришни) бошқаларга қараганда кўпроқ истамаймиз», — деб тушунтирди Хабек.
Шу билан бирга, Оқ уй Германиянинг позициясида мантиқ кўрмаяпти, чунки немис Леопард танклари Украинага Американинг Abrams танкларидан эртароқ етиб бориши мумкин, Украина ҳарбийлари эса уларни қандай бошқаришни тезроқ ўрганади, деди Bloomberg’нинг АҚШ президенти маъмуриятидаги манбалари.
«Улар бизни қийин аҳволга солиб қўйишди», — деди Байден маъмуриятининг юқори мартабали амалдори CNN нашрига. Унинг фикрича, Берлин ўз позициясини ўзгартирадиганга ўхшамаяпти.
18 январь, чоршанба куни Давосда бўлиб ўтган Жаҳон иқтисодий форуми доирасида Германия канцлери Олаф Шольц ҳам танклар борасида шундай позицияни билдирганди. У АҚШ конгрессменларини АҚШ танкларини Германия билан бир вақтда юборишга чақирди. Шольц ўз шарти ҳақида АҚШ президенти Жо Байден билан суҳбатда гапирган, бироқ Байден Abrams танкларини Украинага юбориш ниятини тасдиқламаган.
АҚШ ҳукумати оғир Abrams танкларини (оғирлиги 55 тонна) техник сабабларга кўра Киевга юборишни маъқулламаяпти — танкларнинг газ турбинали двигателлари жуда катта миқдорда ёнилғи сарфлайди, бузилишларга мойил ва уларга техник хизмат кўрсатиш учун юқори малакали ходимлар керак. Оқ уйнинг таъкидлашича, уларга хизмат кўрсатиш нархи жуда юқори.
Изоҳ (0)