Twitter’нинг кунлик даромади реклама берувчиларнинг йўқотилиши оқибатида ўтган йилнинг шу даврига нисбатан 40 фоизга камайди. Бу The Information порталига таяниб, «ТАСС» хабар берди.
Ижтимоий тармоқларда реклама бўйича менежер Сиддхарт Раонинг сўзларига кўра, октябрь охирида Илон Маск Twitter’ни сотиб олганидан сўнг 500 дан ортиқ энг яхши реклама берувчилар компания билан ишлашни тўхтатди.
Декабрь ойи охирида Twitter ижтимоий тармоғи реклама берувчиларнинг билан шартномаларнинг камайиб кетгани ва яқин орадаги қарз тўловлари туфайли янги инвесторларни қидираётгани ҳақида хабар берилган.
Маълумотларга кўра, Twitter эгаси Илон Маскнинг оилавий офис бошқарувчи директори Жаред Бурчалл шу ҳафта потенциал инвесторларга компания акцияларини 54,2 доллардан сотиб олишни таклиф қилди.
Бу Маск октябрь ойида компанияни сотиб олишда ҳар бир акция учун тўлаган суммага тенг.
Маск компания харажатларини камайтириш бўйича олиб бораётган сиёсат 2023 йилни йўқотишларсиз якунлаш имконини беришини таъкидлаган.
Илон Маск Twitter’ни сотиб олганидан сўнг, унинг бошқарув сиёсати туфайли кўплаб реклама берувчилар ижтимоий тармоқ билан шартномаларини тўхтатиб қўйган ва бу жараён давом этмоқда.
Бу компаниянинг даромадлари ва 13 миллиард долларлик қарзи бўйича фоизларни тўлаш қобилиятига жиддий таъсир кўрсатади.
Илон Маск Twitter’ни сотиб олиш бўйича келишувни 27 октябрь куни якунлаб, компания учун 44 миллиард доллар тўлаган.
Шундан сўнг тадбиркор ижтимоий тармоқ ходимларининг ярмига яқинини ишдан бўшатди, қолганларни эса юқори интенсивлик билан ишлаш кераклиги ҳақида огоҳлантирди.
ОАВ хабарларига кўра, ушбу воқеалар фонида платформа фаолиятини сақлаб қолиш учун муҳим бўлган кўплаб ходимлар Twitter’ни тарк этган.
Изоҳ (0)