“Daryo” nashri 18-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Serbiya Vagnerdan serblarni Ukraina-Rossiya urushiga yollashni to‘xtatishini talab qilmoqda
Serbiya prezidenti Aleksandr Vuchich “Vagner” xususiy harbiy kompaniyasidan mamlakat fuqarolarini Rossiya—Ukraina urushida qatnashish uchun yollashni to‘xtatishni talab qildi. Bu haqda u serb telekanaliga bergan intervyusida ma’lum qildi, deb xabar beradi Reuters.
“Nega siz, ‘Vagner’dagilar, Serbiyadan odamlarni safingizga qo‘shilish uchun chaqiryapsiz, vaholanki bu bizning qonunlarga zid ekanini bilasiz” — deya prezidentning so‘zlarini keltiradi Reuters.
Dekabr oyi boshida “Vagner markazi” Telegram kanali “do‘stlik va hamkorlik uchun rus-serb madaniyat-axborot markazi” ochilishini e’lon qilgandi. Yanvar oyi boshida AQSH Davlat departamenti maslahatchisi Derek Sholle Vashington “Vagner” guruhining Serbiya hududidagi faoliyatidan xavotirda ekanini aytdi.
Yanvar o‘rtalarida “RIA Novosti” agentligi Zaporojye viloyatining Rossiyaga qo‘shib olingan qismiga Serbiyadan birinchi “ko‘ngillilar” yetib kelgani haqida xabar berdi. Respublika mudofaa vaziri Milosh Vuchevich bu jinoiy javobgarlikka olib kelishi mumkinligi haqida ogohlantirsa-da, “Vagner” asoschisi Yevgeniy Prigojin guruh Serbiyada mavjud emasligini aytgan.
Serbiya qonunlari mamlakat fuqarolariga xorijdagi qurolli mojarolarda qatnashishni taqiqlaydi. “Ozodlik” radiosining Serbiya xizmati ma’lumotlariga ko‘ra, mamlakat sudlari Ukrainada Rossiya tomonidan jang qilgan 30 dan ortiq kishiga ayblov e’lon qilgan.
Rossiya Turkmaniston bilan energetika masalasini muhokama qildi. Mixail Mishustin Turkmanistonga tashrif buyuradi
Turkmaniston va Rossiya prezidentlari Serdar Berdimuhamedov va Vladimir Putin 17-yanvar kuni telefon orqali suhbatlashdi. “Rossiya-Turkmaniston strategik sherikligi doirasida, davlat rahbari energetika sohasidagi amaliy hamkorlik yuzasidan bir qator muayyan masalalarni muhokama qildi”, — deyiladi Kreml matbuot xizmati xabarida boshqa tafsilotlar keltirilmagan holda.
Shuningdek, Rossiya hukumati rahbari Mixail Mishustin 19—20-yanvar kunlari Turkmanistonga tashrif buyurishi ma’lum bo‘ldi. Avvalroq Turkmaniston bosh vaziri o‘rinbosari Shohim Abdurahmonov mamlakatda birinchi yerosti gaz ombori qurilishini ma’lum qilgan edi. Uning so‘zlariga ko‘ra, gaz ombori “tovar gazi zaxiralarini ta’minlash uchun” quriladi.
Eslatib o‘tamiz, Tabiiy gaz zaxiralari bo‘yicha Turkmaniston Rossiya, Eron va Qatar bilan birgalikda dunyoning birinchi to‘rtligiga kiradi.
“Neytral” Ukraina g‘oyasidan voz kechilib, Ukrainaning NATOga kirishi qo‘llab quvvatlanmoqda
Parij tinchlik kelishuviga erishishdagi roli uchun Nobel mukofotiga sazovor bo‘lgan AQSHning sobiq davlat kotibi Genri Kissinjer, Ukrainaning “neytral” maqomi g‘oyasidan voz kechdi.
Bu haqda u Davosdagi forumda so‘zlagan nutqida gapirdi.
“Urushdan oldin men Ukrainaning NATOga a’zo bo‘lishiga qarshi edim, chunki hozir biz guvoh bo‘layotgan hodisalarning boshlanishidan qo‘rqardim. Hozir bu jarayon shunday darajaga yetgani sababli, ushbu sharoitda neytral Ukraina g‘oyasi endi mantiqiy emas. Oxir-oqibat, u NATOdan qanday shaklda bo‘lsa ham kafolatlar olishi kerak. Endi Ukrainaning NATOga kirishi maqbul yo‘l”, — degan sobiq kotib.
Bir oy oldin Kissinjer The Spectator jurnali uchun maqola yozib, Ukrainadagi urushni “tinch yo‘l bilan hal qilishni” taklif qilgan edi. U o‘zining bir nechta variantini taqdim etgan: masalan, xalqaro nazorat ostida Rossiya tomonidan bosib olingan hududlarda referendumlar o‘tkazish yoki Ukrainaning 24-fevralgacha bo‘lgan chegaralariga qaytishi kabi.
Ushbu maqolaga Rossiya tomoni fikr bildirar ekan: “Kissinjerning iste’dodi, tajribasi va tahliliga bunday keskin vaziyatlarda har doim talab borligini ta'kidlab, ammo hozircha, afsuski, bunday imkoniyat yo‘q”, — degan edi Rossiya prezidentining matbuot kotibi Dmitriy Peskov.
O‘zbekistonda sudlarning ayrim yo‘nalishlarida prokuror nazorati qisqartiriladi, ma’lum bir sud ishlarini yuritish ma’muriy organlarga o‘tkaziladi
“Odil sudlov faoliyatini amalga oshirishni samarali tashkil etish bo‘yicha qo‘shimcha chora-tadbirlar to‘g‘risida”gi prezident farmoni qabul qilindi.
Farmonga ko‘ra, ayrim toifadagi fuqarolik, iqtisodiy va ma’muriy huquqbuzarlik to‘g‘risidagi ishlarni ko‘rish vakolatini tegishliligi bo‘yicha ma’muriy organlarga o‘tkazish tartibi joriy etiladi.Shuningdek, ayrim toifadagi jinoyat, fuqarolik, iqtisodiy va ma’muriy huquqbuzarlik to‘g‘risidagi ishlarni quyi instansiya sudlarining o‘zida yakunlash tartibi belgilanadi.
Ayrim yo‘nalishlarda prokuror nazorati qisqartiriladi, Bosh prokuratura huzuridagi tashkilotlar shtat birliklari maqbullashtiriladi hamda uning hisobidan Ixtisoslashgan prokurorlar korpusi shtat birliklari soni ko‘paytiriladi.
Ixtisoslashgan prokurorlar korpusi xodimlari sud binolarida o‘tiradi.
Izoh (0)