“Tolibon” generali Ilon Mask Afg‘onistonda tug‘ilganini ma’lum qildi

“Tolibon” harakati generali Mobinxon Muhammad o‘zining Twitter sahifasida milliarder Ilon Mask Afg‘onistonda tug‘ilganini ma’lum qildi.

Uning so‘zlariga ko‘ra, Ilon Mask Afg‘onistonning Logar viloyati, Azar tumanida tavallud topgan va hozirda AQSHda qochqin sifatida yashamoqda. Holat yuzasidan ijtimoiy tarmoq foydalanuvchilari Maskka murojaat qilib, tvitga izoh bildirishni so‘ragan.

Mobinxon Muhammad Twitter’da rasmiy verifikatsiya belgisiga ega, biroq uning “ko‘k galochka”si 18-yanvar kuni olib qo‘yilgan. Ehtimol, bunga Ilon Maskning “kelib chiqishi” haqidagi tvit sabab bo‘lgan bo‘lishi mumkin. “Tolibon” vakillari Twitter’da pulli verifikatsiya xizmatiga ro‘yxatdan o‘tishni boshlagan, ulardan ba’zilarining akkauntlarida “ko‘k galochka”lar paydo bo‘lgan. “Tolibon”ning ikki rasmiysi va Afg‘onistondagi harakatning asosiy tarafdorlaridan to‘rt nafari “galochka”lardan foydalanmoqda.

Ma’lumot uchun, milliarder Ilon Mask Janubiy Afrikaning ma’muriy poytaxti Pretoriyada tug‘ilib o‘sgan. U 17 yoshida Kanadaga ko‘chib o‘tgan va Kingstondagi Kvins universitetida tahsil olgan. U 2 yildan so‘ng AQSHning Pensilvaniya universitetida o‘qishni davom ettirgan.