«Дарё» нашри 18 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Сербия Вагнердан сербларни Украина-Россия урушига ёллашни тўхтатишини талаб қилмоқда
Сербия президенти Александр Вучич «Вагнер» хусусий ҳарбий компаниясидан мамлакат фуқароларини Россия—Украина урушида қатнашиш учун ёллашни тўхтатишни талаб қилди. Бу ҳақда у серб телеканалига берган интервьюсида маълум қилди, деб хабар беради Reuters.
«Нега сиз, ‘Вагнеръдагилар, Сербиядан одамларни сафингизга қўшилиш учун чақиряпсиз, ваҳоланки бу бизнинг қонунларга зид эканини биласиз» — дея президентнинг сўзларини келтиради Reuters.
Декабрь ойи бошида «Вагнер маркази» Telegram канали «дўстлик ва ҳамкорлик учун рус-серб маданият-ахборот маркази» очилишини эълон қилганди. Январь ойи бошида АҚШ Давлат департаменти маслаҳатчиси Дерек Шолле Вашингтон «Вагнер» гуруҳининг Сербия ҳудудидаги фаолиятидан хавотирда эканини айтди.
Январь ўрталарида «РИА Новости» агентлиги Запорожье вилоятининг Россияга қўшиб олинган қисмига Сербиядан биринчи «кўнгиллилар» етиб келгани ҳақида хабар берди. Республика мудофаа вазири Милош Вучевич бу жиноий жавобгарликка олиб келиши мумкинлиги ҳақида огоҳлантирса-да, «Вагнер» асосчиси Евгений Пригожин гуруҳ Сербияда мавжуд эмаслигини айтган.
Сербия қонунлари мамлакат фуқароларига хориждаги қуролли можароларда қатнашишни тақиқлайди. «Озодлик» радиосининг Сербия хизмати маълумотларига кўра, мамлакат судлари Украинада Россия томонидан жанг қилган 30 дан ортиқ кишига айблов эълон қилган.
Россия Туркманистон билан энергетика масаласини муҳокама қилди. Михаил Мишустин Туркманистонга ташриф буюради
Туркманистон ва Россия президентлари Сердар Бердимуҳамедов ва Владимир Путин 17 январь куни телефон орқали суҳбатлашди. «Россия-Туркманистон стратегик шериклиги доирасида, давлат раҳбари энергетика соҳасидаги амалий ҳамкорлик юзасидан бир қатор муайян масалаларни муҳокама қилди», — дейилади Кремль матбуот хизмати хабарида бошқа тафсилотлар келтирилмаган ҳолда.
Шунингдек, Россия ҳукумати раҳбари Михаил Мишустин 19—20 январь кунлари Туркманистонга ташриф буюриши маълум бўлди. Аввалроқ Туркманистон бош вазири ўринбосари Шоҳим Абдураҳмонов мамлакатда биринчи ерости газ омбори қурилишини маълум қилган эди. Унинг сўзларига кўра, газ омбори «товар гази захираларини таъминлаш учун» қурилади.
Эслатиб ўтамиз, Табиий газ захиралари бўйича Туркманистон Россия, Эрон ва Қатар билан биргаликда дунёнинг биринчи тўртлигига киради.
«Нейтрал» Украина ғоясидан воз кечилиб, Украинанинг НАТОга кириши қўллаб қувватланмоқда
Париж тинчлик келишувига эришишдаги роли учун Нобель мукофотига сазовор бўлган АҚШнинг собиқ давлат котиби Генри Киссинжер, Украинанинг «нейтрал» мақоми ғоясидан воз кечди.
Бу ҳақда у Давосдаги форумда сўзлаган нутқида гапирди.
«Урушдан олдин мен Украинанинг НАТОга аъзо бўлишига қарши эдим, чунки ҳозир биз гувоҳ бўлаётган ҳодисаларнинг бошланишидан қўрқардим. Ҳозир бу жараён шундай даражага етгани сабабли, ушбу шароитда нейтрал Украина ғояси энди мантиқий эмас. Охир-оқибат, у НАТОдан қандай шаклда бўлса ҳам кафолатлар олиши керак. Энди Украинанинг НАТОга кириши мақбул йўл», — деган собиқ котиб.
Бир ой олдин Киссинжер The Spectator журнали учун мақола ёзиб, Украинадаги урушни «тинч йўл билан ҳал қилишни» таклиф қилган эди. У ўзининг бир нечта вариантини тақдим этган: масалан, халқаро назорат остида Россия томонидан босиб олинган ҳудудларда референдумлар ўтказиш ёки Украинанинг 24 февралгача бўлган чегараларига қайтиши каби.
Ушбу мақолага Россия томони фикр билдирар экан: «Киссинжернинг истеъдоди, тажрибаси ва таҳлилига бундай кескин вазиятларда ҳар доим талаб борлигини таъкидлаб, аммо ҳозирча, афсуски, бундай имконият йўқ», — деган эди Россия президентининг матбуот котиби Дмитрий Песков.
Ўзбекистонда судларнинг айрим йўналишларида прокурор назорати қисқартирилади, маълум бир суд ишларини юритиш маъмурий органларга ўтказилади
«Одил судлов фаолиятини амалга оширишни самарали ташкил этиш бўйича қўшимча чора-тадбирлар тўғрисида»ги президент фармони қабул қилинди.
Фармонга кўра, айрим тоифадаги фуқаролик, иқтисодий ва маъмурий ҳуқуқбузарлик тўғрисидаги ишларни кўриш ваколатини тегишлилиги бўйича маъмурий органларга ўтказиш тартиби жорий этилади. Шунингдек, айрим тоифадаги жиноят, фуқаролик, иқтисодий ва маъмурий ҳуқуқбузарлик тўғрисидаги ишларни қуйи инстанция судларининг ўзида якунлаш тартиби белгиланади.
Айрим йўналишларда прокурор назорати қисқартирилади, Бош прокуратура ҳузуридаги ташкилотлар штат бирликлари мақбуллаштирилади ҳамда унинг ҳисобидан Ихтисослашган прокурорлар корпуси штат бирликлари сони кўпайтирилади.
Ихтисослашган прокурорлар корпуси ходимлари суд биноларида ўтиради.
Изоҳ (0)