Rossiya bilan urush Ukrainani G‘arb qurollarini sinovdan o‘tkazuvchi “laboratoriya”ga aylantirdi hamda AQSH va uning ittifoqchilariga o‘z qurollarining zaif tomonlarini o‘rganish uchun zarur bo‘lgan kamdan-kam imkoniyatni berdi, deb yozmoqda CNN.
CNN maqolasi mualliflarining ta’kidlashicha, AQSH harbiylari Ukrainadagi urushning borishini diqqat bilan kuzatmoqda, bu ularga G‘arb qurol tizimlari intensiv qo‘llanganda qanday ishlashi va har ikki tomon foydalanayotgan o‘q-dorilarni o‘rganishga yordam beradi.
“Ukraina — har tomonlama qurol laboratoriyasi, chunki bu tizimlarning hech biri shu paytgacha sanoati rivojlangan ikki davlat o‘rtasidagi urushda ishlatilmagan. Bu real vaqt rejimidagi jangovar sinovlar”, — dedi CNN telekanaliga G‘arb razvedka agentligiga yaqin manba.
AQSH harbiylari uchun Ukrainadagi mojaro Amerika tizimlarining foydaliligi haqida “aql bovar qilmaydigan ma’lumotlar manbai”ga aylandi, deya qo‘shimcha qilgan Pentagondagi manba. U HIMARS yoppasiga o‘t ochuvchi reaktiv tizimini bunga misol qilib keltirdi va ularning samaradorligi “kutilmagan yangilikka aylanganini” ta’kidladi.
“Shu bilan birga, M777 gaubitsalari unchalik yaxshi ishlamadi, chunki faol o‘t ochilganda ularning stvollari juda tez eskiradi”, — deya qo‘shimcha qildi AQSH harbiy departamentidagi yana bir manba.
CNN ma’lumotlariga ko‘ra, Ukraina harbiylari ham “G‘arb rasmiylarini hayratga solgan” taktik yangiliklarni kiritgan. Ularga misol qilib CNN piyoda askarlarning kichik guruhlari arzon planshetlar va smartfonlarga eng yangi dasturiy ta’minot o‘rnatilib, ularning murakkab nishonga olish vositalariga aylantirilishi, shuningdek kichik dronlarning granatalarni tashlashda qo‘llanishini sanadi.
O‘z qurol tizimlaridan tashqari, AQSH Rossiya qurollarining, shuningdek, kamikadze dronlarining samaradorligini kuzatib bormoqda, deb ta’kidladi CNN.
Izoh (0)