Россия билан уруш Украинани Ғарб қуролларини синовдан ўтказувчи «лаборатория»га айлантирди ҳамда АҚШ ва унинг иттифоқчиларига ўз қуролларининг заиф томонларини ўрганиш учун зарур бўлган камдан-кам имкониятни берди, деб ёзмоқда CNN.
CNN мақоласи муаллифларининг таъкидлашича, АҚШ ҳарбийлари Украинадаги урушнинг боришини диққат билан кузатмоқда, бу уларга Ғарб қурол тизимлари интенсив қўлланганда қандай ишлаши ва ҳар икки томон фойдаланаётган ўқ-дориларни ўрганишга ёрдам беради.
«Украина — ҳар томонлама қурол лабораторияси, чунки бу тизимларнинг ҳеч бири шу пайтгача саноати ривожланган икки давлат ўртасидаги урушда ишлатилмаган. Бу реал вақт режимидаги жанговар синовлар», — деди CNN телеканалига Ғарб разведка агентлигига яқин манба.
АҚШ ҳарбийлари учун Украинадаги можаро Америка тизимларининг фойдалилиги ҳақида «ақл бовар қилмайдиган маълумотлар манбаи»га айланди, дея қўшимча қилган Пентагондаги манба. У HIMARS ёппасига ўт очувчи реактив тизимини бунга мисол қилиб келтирди ва уларнинг самарадорлиги «кутилмаган янгиликка айланганини» таъкидлади.
«Шу билан бирга, М777 гаубицалари унчалик яхши ишламади, чунки фаол ўт очилганда уларнинг стволлари жуда тез эскиради», — дея қўшимча қилди АҚШ ҳарбий департаментидаги яна бир манба.
CNN маълумотларига кўра, Украина ҳарбийлари ҳам «Ғарб расмийларини ҳайратга солган» тактик янгиликларни киритган. Уларга мисол қилиб CNN пиёда аскарларнинг кичик гуруҳлари арзон планшетлар ва смартфонларга энг янги дастурий таъминот ўрнатилиб, уларнинг мураккаб нишонга олиш воситаларига айлантирилиши, шунингдек кичик дронларнинг гранаталарни ташлашда қўлланишини санади.
Ўз қурол тизимларидан ташқари, АҚШ Россия қуролларининг, шунингдек, камикадзе дронларининг самарадорлигини кузатиб бормоқда, деб таъкидлади CNN.
Изоҳ (0)