Rossiyaning Belgorod viloyati, Tonenkoye qo‘rg‘onidagi madaniyat uyi binosida joylashgan harbiy qism hududida askar RGD-5 granatasini portlatib yubordi, deb xabar bermoqda Meduza. So‘nggi ma’lumotlarga ko‘ra, oqibatida uch kishi halok bo‘lgan, 16 kishi jarohatlangan. Yana sakkiz kishi bedarak yo‘qolgan.
Mash nashrining yozishicha, hodisa 14-yanvar kuni ertalab, Toshkent vaqti bilan 6:50 da sodir bo‘lgan. Portlash rossiyalik harbiylar joylashgan sobiq madaniyat uyi binosida yuz bergan. Favqulodda xizmatlarning “Interfaks”ga ma’lum qilishicha, serjant (boshqa ma’lumotlarga ko‘ra, katta serjant) yotoqxonada tasodifan qo‘l granatasini portlatib yuborgan, oqibatda vzvod o‘qlari portlab, yong‘in boshlangan.
“112” Telegram kanali binoda granataning portlashi ortidan “qurol saqlanadigan xonadagi o‘q-dorilar portlagan”i haqida yozdi. Unga ko‘ra, yong‘in maydoni 450 kvadrat metrni tashkil etgan. Portlashga sababchi bo‘lgan askar omon qolgan va kasalxonaga yotqizilgan. Dam olish maskaniga tutash binolardan 15 kishi evakuatsiya qilingan, mahalliy aholidan hech kim jabrlanmagan.
Baza nashrining ta’kidlashicha, bo‘linmadagi portlashni Sverdlovsk viloyatidan kelgan harbiy xizmatchi uyushtirgan (ismi ko‘rsatilmagan), yaradorlar va halok bo‘lganlarning barchasi urushga safarbar qilinganlar edi.
“Dastlabki ma’lumotlarga ko‘ra, askar o‘z qo‘l ostidagilar oldida obro‘ qozonish uchun RGD-5 granatasini qo‘liga olgan”, — deb yozadi Baza.
“112” xabariga ko‘ra, hodisa yuzasidan jinoiy ish qo‘zg‘atilgan, biroq qaysi modda bo‘yicha ish ochilgani noma’lum. REN telekanali Tonenkoye qo‘rg‘oni qurshab olingani, jurnalistlar uning hududiga kiritilmagani haqida xabar berdi.
Izoh (0)