Gruziya o‘zini harbiy mojaroga tortishlariga yo‘l qo‘ymaydi, dedi mamlakat bosh vaziri o‘rinbosari Teya Sulukiani Tbilisining Kiyevga harbiy yordam berishdan bosh tortish haqidagi qarorini izohlab. Uning so‘zlarini “Sputnik Gruziya” keltirdi.
Ukrainaning Gruziyadagi muvaqqat ishlar vakili Andrey Kasyanov “Yevropa haqiqati” gazetasiga bergan maqolasida Kiyev Tbilisidan 2008-yilda berilgan “Buk” komplekslarini qaytarishni, hamda AQSHdan olgan Javelin raketa komplekslarini so‘ragani, biroq Gruziya rad javobini bergani haqida yozgandi. Gruziya Mudofaa vazirligi bunga javoban “Buk” tizimlarini 2007-yilda bir necha million dollarga sotib olganini tushuntirdi.
“Javob bitta — Gruziya hukumati Gruziya mamlakatining harbiy qarama-qarshilikka kirishiga yo‘l qo‘ymaydi. Shuning uchun biz, albatta, harbiy mojaro ishtirokchilarining hech biriga harbiy yordam bermaymiz, ayniqsa, bilishimcha, gap biz sotib olgan qurollarni qaytarish haqida borayotganda”, — dedi Sulukiani.
Gruziya tomoni Ukrainaga qurol yetkazib berishga rozi emas, urush ishtirokchisi bo‘lishni istamaydi, deb ta’kidagan Gruziya Mudofaa vazirligi. Ukraina prezidenti ofisi rahbari maslahatchisi Mixail Podolyak Gruziyaning qurol-yarog‘ bilan yordam berishni istamasligiga qarab, Tbilisi o‘n bir yarim oylik jangovar harakatlardan keyin ham “kimning tarafida bo‘lishi kerakligini” tushunmayotganini aytdi.
Mavzuga doir: Gruziya Ukrainaga yordam sifatida yuborish uchun generatorlar sotib olmoqda
Izoh (0)