Грузия ўзини ҳарбий можарога тортишларига йўл қўймайди, деди мамлакат бош вазири ўринбосари Тея Сулукиани Тбилисининг Киевга ҳарбий ёрдам беришдан бош тортиш ҳақидаги қарорини изоҳлаб. Унинг сўзларини «Спутник Грузия» келтирди.
Украинанинг Грузиядаги муваққат ишлар вакили Андрей Касянов «Европа ҳақиқати» газетасига берган мақоласида Киев Тбилисидан 2008 йилда берилган «Бук» комплексларини қайтаришни, ҳамда АҚШдан олган Javelin ракета комплексларини сўрагани, бироқ Грузия рад жавобини бергани ҳақида ёзганди. Грузия Мудофаа вазирлиги бунга жавобан «Бук» тизимларини 2007 йилда бир неча миллион долларга сотиб олганини тушунтирди.
«Жавоб битта — Грузия ҳукумати Грузия мамлакатининг ҳарбий қарама-қаршиликка киришига йўл қўймайди. Шунинг учун биз, албатта, ҳарбий можаро иштирокчиларининг ҳеч бирига ҳарбий ёрдам бермаймиз, айниқса, билишимча, гап биз сотиб олган қуролларни қайтариш ҳақида бораётганда», — деди Сулукиани.
Грузия томони Украинага қурол етказиб беришга рози эмас, уруш иштирокчиси бўлишни истамайди, деб таъкидаган Грузия Мудофаа вазирлиги. Украина президенти офиси раҳбари маслаҳатчиси Михаил Подоляк Грузиянинг қурол-яроғ билан ёрдам беришни истамаслигига қараб, Тбилиси ўн бир ярим ойлик жанговар ҳаракатлардан кейин ҳам «кимнинг тарафида бўлиши кераклигини» тушунмаётганини айтди.
Мавзуга доир: Грузия Украинага ёрдам сифатида юбориш учун генераторлар сотиб олмоқда
Изоҳ (0)