Соледар туз конларидаги туннеллар 150 метрдан 300 метргача чуқурликда жойлашган ва Бахмутга олиб бормайди. Бу ҳақда The Wall Street Journal Соледарнинг «Артемсоль» корхонаси бош геологи Виктория Скрипникка таяниб хабар берди.
«Конлар орқали Бахмутга ўтиш йўли йўқ», — деди у.
Скрипник кондаги туннеллар ҳарбий мақсадларда фойдаланилиши мумкинлигига шубҳа билдирди, чунки техника элеваторларга сиғмайди. Туз қазиб олиш учун қурилма пастга туширишдан аввал бўлакларга бўлинади, сўнг конда қайтадан йиғилади, деди у.
Газета қайд этишича, Соледардаги туз кони Европадаги энг йирикларидан бири ҳисобланади. 2021 йилда мамлакатда туз ишлаб чиқариш ҳажмининг 95 фоизи унга тўғри келган. Россия махсус операцияси бошланганидан кейин, апрелда коннинг биринчи марта ёпилиши натижасида Украинада туз нархи беш маротаба ошиб кетган.
7 январь куни «Вагнер» гуруҳи асосчиси Евгений Пригожин Соледар ва Бахмут конлари тизими ҳақида гапириб бериб, у «ерости шаҳарлари тармоғи»дан иборат эканини айтганди. Унинг сўзларига кўра, 80—100 метр чуқурликда нафақат одамлар тўпланган, балки танклар ва пиёда жанговар машиналари ҳам сиғган. «Қурол-яроғ захираалри эса Биринчи жаҳон урушидан буён сақланиб келмоқда», — дея қўшиб қўйганди у.
Россия ҳарбийлари 12 январь куни кечқурун Соледарни тўлиқ назорат остига олгани ҳақида мамлакат Мудофаа вазирлиги хабар берганди.
«Вагнер» хусусий ҳарбий компанияси асосчиси Евгений Пригожин 11 январга ўтар кечаси унинг бўлинмалари Донецк вилоятидаги Соледар шаҳрини назорат остига олгани ҳақида баёнот берган эди. Бизнесменнинг матбуот хизмати у ҳарбийлар қуршовида, гўёки, ўша шаҳарда қазиладиган туз конларида тургани акс этган суратларни эълон қилганди. Кейинроқ Украина қуролли кучлари Шарқий гуруҳи вакили Сергей Череватий Пригожиннинг даъволарини ёлғон деб атади ва журналистларга Бош штаб эълон қиладиган тафсилотларни кутишни тавсия қилди. Соледар — Донецк вилоятидаги кичик шаҳар бўлиб, сўнгги вақтларда у учун шафқатсиз жанглар бормоқда. Унинг қўлдан бой берилиши Украина қўшинлари учун анча каттароқ бўлган Бахмут шаҳри мудофаасини қийинлаштириши мумкин, унга эса бир неча ойлардан буён россияликлар томонидан ҳужум олиб борилмоқда.
Изоҳ (0)