“Hududiy elektr tarmoqlari” elektr energiyasidagi nosozliklarni gaz va issiqlik energiyasi ta’minotidagi uzilishlar bilan bog‘ladi

“Hududiy elektr tarmoqlari” aksiyadorlik jamiyatining Toshkent shahar filiali O‘zbekistonda hukm surayotgan anomal ob-havo sharoitida olib borilayotgan ishlar yuzasidan iste’molchilarga murojaat qildi.

Qayd etilishicha, respublika bo‘ylab anomal sovuq ob-havo tufayli xonadonlarga berilayotgan gaz bosimi hamda issiqlik energiyasi haroratining tushib ketgani sababli asosiy yuklama elektr ta’minotiga tushishi oqibatida elektr yetkazib berish va ta’minotda uzilishlar kuzatilmoqda. Buning oqibatida Toshkent shahrining ko‘plab tumanlaridagi elektr tarmoqlarida nosozliklar yuzaga kelib, ta’minotda favqulodda uzilishlar sodir bo‘lmoqda.

Shu munosabat bilan aholi va ijtimoiy soha obyektlarini energiya resurslari bilan barqaror ta’minlash maqsadida tunu-kun filialimiz tomonidan tegishli choralar ko‘rilmoqda.

“Hududiy elektr tarmoqlari” AJ Toshkent shahar filiali tomonidan joylarda yuzaga kelayotgan nosozliklarni oldini olish hamda favqulodda avariyali uzilishlarni tezlik bilan o‘z vaqtida bartaraf etish maqsadida kuchaytirilgan navbatchilik shtabi tashkil etilgan.

Anomal sovuq kunlar davrida elektr energiyasini uzluksiz yetkazib tug‘uruqxonalar, shifoxonalar, muruvvat va mehribonlik uylarining elektr ta’minotini berish, tizimda avariyali uzilishlarni tezkor bartaraf etish, ijtimoiy soha obyektlarini alohida nazoratga olish hamda favqulodda holatga barcha elektr qurilmalarini shay holatga keltirish maqsadida tashkil etilgan tezkor chiqish brigadalariga qo‘shimcha mutaxassislar jalb etilgan.

Iste’molchilarni elektr energiyasi bilan ta’minlashda asosiy o‘ringa ega bo‘lgan podstansiyalarga, yuqori kuchlanishli elektr uzatish tarmoqlariga, tuman elektr ta’minoti korxonalaridagi navbatchilik bo‘limlariga qo‘shimcha malakali mutaxassislar jalb etilib, yetkazib berilayotgan elektr energiyasi tunu-kun nazorat qilib borilmoqda.

Xususan, 14-yanvar kuni davomida 100 dan ortiq elektr qurilmalarida yuzaga kelgan nosozliklar bartaraf etilgan.

Nosozliklarni bartaraf etish uchun barcha korxonalarda 24 soat faoliyat yurituvchi maxsus brigadalar tashkil etilgan bo‘lib, ular zarur transport vositalari, qo‘shimcha elektr qurilmalari zaxiralari bilan ta’minlangan.

Bundan tashqari, tarmoqlarda yuklamani kamaytirish hamda energiya resurslarini birinchi navbatda aholi va tibbiyot muassasalariga yetkazib berish uchun yirik sanoat korxonalariga gaz va elektr energiyasi yetkazib berish hajmi keskin kamaytirilgan.

Barcha hududlardagi ko‘cha yoritish chiroqlarining bir qismi o‘chirilib, undan tejalgan elektr energiyasi aholiga yo‘naltirilmoqda.

Shu o‘rinda iste’molchilardan vaziyatni to‘g‘ri tushungan holda energiya resurslardan imkon qadar samarali foydalanishlarini, nostandart, energiya samarasiz qurilmalardan foydalanmasliklarini iltimos qilamiz. Iqtisod qilingan elektr energiyasi boshqa xonadonlarning chirog‘i yonishiga sabab bo‘ladi.

Shuningdek, ayni kunlarda Toshkent shahrida vujudga kelgan avariyaviy hodislarni tezkor bartaraf etish maqsadida “Hududiy elektr tarmoqlari” AJning respublika bo‘ylab barcha hududiy filiallaridan qo‘shimcha kuchlar safarbar etilganligini ma’lum qilamiz, — deyiladi xabarda.