O‘zbekiston xalq shoiri Enaxon Siddiqova 13-yanvar kuni 68 yoshida vafot etgani xabar qilingandi. Shavkat Mirziyoyev marhumaning vafoti yuzasidan ta’ziya bildirdi.
“O‘zbek adabiyoti va madaniyati og‘ir judolikka uchradi”, — deb boshlanadi hamdardlik xabari.
Enaxon Siddiqova 1954-yil 28-avgustda Farg‘ona viloyatining Oltiariq tumanida tug‘ildi. 1976-yilda Farg‘ona davlat pedagogika instituti (hozirgi Farg‘ona davlat universiteti)ning filologiya fakultetini tamomladi.
Mehnat faoliyatini 1976-yilda o‘qituvchilikdan boshlab, Oltiariq va Farg‘ona tumanlaridagi maktablarda o‘zbek tili va adabiyoti fani o‘qituvchisi, maktab direktori bo‘lib ishladi. Qator yillar Farg‘ona tumani va Farg‘ona viloyati hokimliklarida mas’ul vazifalarda ishlab, xotin-qizlarning turmush va mehnat sharoitlarini yaxshilash, oila, onalik va bolalikni ijtimoiy himoya qilish, barkamol avlod tarbiyasi yo‘lida faollik ko‘rsatdi.
Enaxon Siddiqova 2001-yildan hozirgi vaqtga qadar O‘zbekiston Yozuvchilar uyushmasining Farg‘ona viloyati bo‘limi rahbari sifatida qizg‘in mehnat qildi.
“U viloyatda adabiyot, madaniyat va san’atni rivojlantirish, joylarda ilm-fan va kitobxonlikni keng targ‘ib qilish orqali xalqimiz ma’naviyatini yuksaltirish borasida samarali xizmat qildi. Yuzlab yoshlarga ustozlik qilib, ularning salohiyatini ro‘yobga chiqarishda tashabbuskor bo‘ldi. Ayniqsa, Farg‘ona viloyatida O‘zbekiston Qahramoni, ulug‘ o‘zbek shoiri Erkin Vohidov nomidagi ijod maktabini tashkil etish va uning faoliyatini yo‘lga qo‘yishda chinakam jonbozlik ko‘rsatib xizmat qildi”, — deyiladi xabarda.
Ta’kidlanishicha, Enaxon Siddiqova 2015-yilda Oliy Majlisi Senatining a’zosi sifatida mustaqillikni mustahkamlash, mamlakatda parlamentarizm tizimini rivojlantirish, ijtimoiy va ma’naviy taraqqiyotimiz uchun zarur bo‘lgan muhim qonunlarni ishlab chiqish va amalga oshirishga katta hissa qo‘shgan.
Marhumaning o‘zbek adabiyoti va madaniyatini rivojlantirish borasidagi xizmatlari davlat tomonidan taqdirlangan. Unga “O‘zbekiston xalq shoiri” faxriy unvoni, “El-yurt hurmati” va “Do‘stlik” ordenlari berilgan.
“Taniqli ijodkor, mehribon ustoz, samimiy va kamtarin inson Enaxon Siddiqovaning xotirasi qalblarimizda hamisha saqlanib qoladi”, — deb yoziladi maktubda.
Izoh (0)