«Ҳудудий электр тармоқлари» акциядорлик жамиятининг Тошкент шаҳар филиали Ўзбекистонда ҳукм сураётган аномал об-ҳаво шароитида олиб борилаётган ишлар юзасидан истеъмолчиларга мурожаат қилди.
Қайд этилишича, республика бўйлаб аномал совуқ об-ҳаво туфайли хонадонларга берилаётган газ босими ҳамда иссиқлик энергияси ҳароратининг тушиб кетгани сабабли асосий юклама электр таъминотига тушиши оқибатида электр етказиб бериш ва таъминотда узилишлар кузатилмоқда. Бунинг оқибатида Тошкент шаҳрининг кўплаб туманларидаги электр тармоқларида носозликлар юзага келиб, таъминотда фавқулодда узилишлар содир бўлмоқда.
Шу муносабат билан аҳоли ва ижтимоий соҳа объектларини энергия ресурслари билан барқарор таъминлаш мақсадида туну-кун филиалимиз томонидан тегишли чоралар кўрилмоқда.
«Ҳудудий электр тармоқлари» АЖ Тошкент шаҳар филиали томонидан жойларда юзага келаётган носозликларни олдини олиш ҳамда фавқулодда аварияли узилишларни тезлик билан ўз вақтида бартараф этиш мақсадида кучайтирилган навбатчилик штаби ташкил этилган.
Аномал совуқ кунлар даврида электр энергиясини узлуксиз етказиб туғуруқхоналар, шифохоналар, мурувват ва меҳрибонлик уйларининг электр таъминотини бериш, тизимда аварияли узилишларни тезкор бартараф этиш, ижтимоий соҳа объектларини алоҳида назоратга олиш ҳамда фавқулодда ҳолатга барча электр қурилмаларини шай ҳолатга келтириш мақсадида ташкил этилган тезкор чиқиш бригадаларига қўшимча мутахассислар жалб этилган.
Истеъмолчиларни электр энергияси билан таъминлашда асосий ўринга эга бўлган подстанцияларга, юқори кучланишли электр узатиш тармоқларига, туман электр таъминоти корхоналаридаги навбатчилик бўлимларига қўшимча малакали мутахассислар жалб этилиб, етказиб берилаётган электр энергияси туну-кун назорат қилиб борилмоқда.
Хусусан, 14 январь куни давомида 100 дан ортиқ электр қурилмаларида юзага келган носозликлар бартараф этилган.
Носозликларни бартараф этиш учун барча корхоналарда 24 соат фаолият юритувчи махсус бригадалар ташкил этилган бўлиб, улар зарур транспорт воситалари, қўшимча электр қурилмалари захиралари билан таъминланган.
Бундан ташқари, тармоқларда юкламани камайтириш ҳамда энергия ресурсларини биринчи навбатда аҳоли ва тиббиёт муассасаларига етказиб бериш учун йирик саноат корхоналарига газ ва электр энергияси етказиб бериш ҳажми кескин камайтирилган.
Барча ҳудудлардаги кўча ёритиш чироқларининг бир қисми ўчирилиб, ундан тежалган электр энергияси аҳолига йўналтирилмоқда.
Шу ўринда истеъмолчилардан вазиятни тўғри тушунган ҳолда энергия ресурслардан имкон қадар самарали фойдаланишларини, ностандарт, энергия самарасиз қурилмалардан фойдаланмасликларини илтимос қиламиз. Иқтисод қилинган электр энергияси бошқа хонадонларнинг чироғи ёнишига сабаб бўлади.Шунингдек, айни кунларда Тошкент шаҳрида вужудга келган авариявий ҳодисларни тезкор бартараф этиш мақсадида «Ҳудудий электр тармоқлари» АЖнинг республика бўйлаб барча ҳудудий филиалларидан қўшимча кучлар сафарбар этилганлигини маълум қиламиз, — дейилади хабарда.
Изоҳ (1)
Шунақа ахволга дуч келмаслик учун ўз вақтида даврий профилактик ишларни амалга ошириш керак !!! Албатта унинг учун етарли билим ва ақл керак !!!
Худудий электр тармоқлари корхоналари қачон охирги маротаба профилактика ва мавсумий тайёргарлик қилишганини ўзлари хам билишмаса керак !!!