“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 14-soni mavzusi “Ayolning gapi — gap” bo‘lib, dastur mehmoni sifatida jurnalist, “Anhor” internet nashri bosh muharriri Lola Islomova taklif etildi.
Jurnalist o‘zbek to‘ylaridagi isrofgarchilik, dabdabaga o‘chlikni tanqid qildi.
— Qudachilik siyosatida juda ham murakkab diplomatiya shakllangan. Masalan, qudamga to‘ydan avval xarajatlarni qisqartirish, isrofgarchilik bo‘lmasligi, hammasi tushunarli va qurbimiz yetganicha bo‘lishi kerakligini aytganman. Bu borada juda ko‘p gapiriladi, hatto prezident ham aytgan. Nafaqat Toshkentda, balki butun O‘zbekistonda ko‘p yigitlar Rossiyaga, Qozog‘istonga ishlash uchun borib qul bo‘lib qolyapti. Nega ketyapsan, degan savolga “To‘y qilishim kerak!” javobini olasiz. Nega bunday bo‘lishi kerak? O‘zimizdan, orzu-havaslarimizdan kelib chiqyapti hammasi. Qancha ko‘p, qanchalik yuqori darajada tanqid qilinmasin, xarajatlar ko‘paygandan ko‘payib ketyapti.
Oxirgi 10-15 yil ichida to‘ylar “sanoat”i juda kuchayib ketdi. Erkaklar chetga chiqib ming azobda tinmay ishlab uyiga pul jo‘natyapti, ayollarimiz to‘yga, mashinaga sarflayapti. Pandemiyada to‘y xarajatlari, mehmonlar soni qisqartirildi, lekin bu davrdan o‘tib olgach, xuddi prujinaga o‘xshab yana avvalgi holatiga qaytdi. Biz ham o‘g‘limni karantin paytida uylantirganmiz, hamma bo‘larkan-ku, imkoni bor ekan-ku, degan. 400-500 ta siz tanimaydigan, umuman birinchi marta ko‘rib turgan odam nega kerak? Mana, shusiz ham ikki yosh baxtli bo‘larkan.Ota-onasiga qayg‘uradigan, isrofgarchilikni yomon ko‘radigan yoshlar bilan bir qatorda, falon so‘mlik ko‘ylak, qimmatbaho mebellar istaydiganlari ham yo‘q emas, afsuski. Lekin bunaqa gaplar ayollardan, qaynonalardan ham chiqadi, “Mebeling bo‘lmaydi, pardang yoqmadi” va hokazo. Bilmayman, buni qanday to‘xtatish mumkin? To‘ylar masalasi o‘ziga xos madaniyatga aylanishi kerak, aslida.
“Subyektiv” YouTube kanalida to‘ylar mavzusi ko‘tarib chiqilgan ko‘rsatuvni ko‘rib tan berdim. Lekin gapiramiz-gapiramiz, baribir esdan chiqib ketadi. Orzu-havasim bor, deyishdan to‘xtashmaydi. Boshqalarni tanqid qilishga qilamiz, o‘zimiz to‘y qilganda (nafs qursin) ishtahamiz ochilib ketaveradi, u qolib ketmasin, bu qolib ketmasin, deya o‘ylaymiz. Shu bilan sekin-sekin xarajatlar ko‘payib boradi. O‘g‘lim uylanganida ham kelin-kuyov biz kattalarni to‘xtatib, xarajatdan qaytarib turgan. Baribir to‘ylar borasida madaniyat shakllanishi kerak, qanday to‘xtatish mumkinligini esa bilmayman, — deydi Lola Islomova.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)