“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 14-soni mavzusi “Ayolning gapi — gap” bo‘lib, dastur mehmoni sifatida jurnalist, “Anhor” internet nashri bosh muharriri Lola Islomova taklif etildi.
— Men mahallada yashayman, mahallaning gapi sekin-sekin quloqqa yetib keladi, ayollar bilan gaplashaman. Hozir davlat tomonidan ham ayollar uchun ko‘p ish qilinyapti. Bir qo‘shnim bor — ikki farzandli yolg‘iz ona — yaqinda bir necha oylik kompyuter kursida bepul o‘qidi, stipendiya ham oldi. Endi hisobchilikka o‘qiyman, deyapti. Ayollarga mahallaning o‘zidan ham, fuqarolardan ham yordam kelyapti.
Turmush o‘rtog‘i vafot etgan bir qarindoshim “temir daftar”da ekan, yozda hokimiyatdan, mahalladan kelib yordam berishlarini aytishgan. Qo‘shaloq to‘y qilayotgan edi, uyingizni ta’mirlab beramiz deb, yarim yildan beri yo‘q bo‘lib ketishibdi. Hozir o‘zi buyurtma uchun ovqat pishiryapti.
Atrofimdagi ayollarni kuzatsam, aksariyatini 15–16–17 yoshida turmushga berishgan. Ma’lumoti, kasbi, hunari yo‘q, farzandlari katta bo‘lib qolgan, o‘zi hech qayerda ishlolmaydi. Lekin endi o‘qish, kasb-hunar o‘rganish, turmush o‘rtog‘iga yordam berish kerakligini tushunyapti, qo‘lidan esa hech nima kelmaydi.Mahalladosh ayollar bilan “Ko‘rpacha” degan loyiha qildik. Biz uchun ko‘rpacha nima? Unda dunyoga kelamiz, unda so‘nggi manzilimizga boramiz, ovqatlanamiz, farzandli bo‘lamiz, hayotimizdagi har jarayonda ko‘rpacha kerak. Mahalladagi ayollar bilan yarim yil ko‘rpacha tikkanmiz, men buyurtma olib kelardim, ular tikib, mehnatlariga haq olishardi, ijtimoiy tarmoqlarda ommalashtirishga harakat qilardik. Menimcha, har bir mahallada shunday kichik mahalliy bizneslarni yo‘lga qo‘yish kerak, — deydi “Anhor” nashri bosh muharriri.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)