Режиссёр Дэниэл Роэр томонидан суратга олинган «Навальний» ҳужжатли фильми Cinema Eye Honors халқаро кинофестивалида иккита мукофотга сазовор бўлди. Бу ҳақда фестиваль сайтида хабар берилган.
Картина «Кино яратишдаги энг яхши ютуқ» ва «Томошабинлар танлови» мукофотларига сазовор бўлди.
Фестивальнинг бош соврини режиссёр Шаунак Сен томонидан суратга олинган «Нафас оладиган ҳамма» фильмига насиб этди — картина яраланган қушларни парваришлаган икки ака-ука ҳақида ҳикоя қилади. Фильм аввалроқ Канн кинофестивалида энг яхши ҳужжатли фильм учун «Олтин кўз» мукофотини қўлга киритганди.
«Навальний» фильмининг премьераси 2022 йил январь ойида «Санденс» кинофестивалида бўлиб ўтган ва унда томошабинлар эътирофи мукофотига сазовор бўлганди. Фильм 2020 йилда сиёсатчининг «Новичок» моддаси билан заҳарланиши, Германияда даволаниши ва Россияга қайтиши ҳақида ҳикоя қилади.
Аввал «Навальний» ҳужжатли фильмлар номинациясида Британиянинг BAFTA мукофоти ҳамда «Оскар» учун номзодлар рўйхатига киритилган эди. 2023 йилги BAFTA тақдирлаш маросими 19 февралда, «Оскар» эса 12 мартда бўлиб ўтади.
Изоҳ (0)