Belarus prezidentligiga sobiq nomzod, faoliyati tugatilgan “Haqiqatni ayt” jamoat birlashmasi hamraisi Andrey Dmitriyev hibsga olindi. Bu haqda “Zerkalo” nashri va “Vesna” inson huquqlari markazi (Belarusda ekstremistik deb tan olingan) xabar bermoqda.
Siyosatchining tanishi “Zerkalo”ga aytishicha, uning hibsga olinishi sababi noma’lumligicha qolmoqda, Dmitriyevning o‘zi telefonga javob bermayapti.
Andrey Dmitriyev 2020-yilgi prezidentlik saylovlarida Belarusning amaldagi prezidenti Aleksandr Lukashenkoning to‘rt nafar raqibidan biri edi. Mamlakat Markaziy saylov komissiyasiga ko‘ra, u 1,2 foiz ovoz olgan. Saylov kampaniyasi davomida u muxolifatchilarni yoqlab chiqqan.
U hamraislik qilgan “Haqiqatni ayt” uyushmasi tashkilot faoliyatida aniqlangan qonunbuzarliklar tufayli 2021-yil oktabr oyida Belarus Oliy sudi tomonidan tugatilgan edi. Dmitriyevning o‘zi avvalroq har qanday sud qaroriga qaramay “Haqiqatni ayt” vakillari o‘z faoliyatini davom ettirishini aytgandi.
Belarusda prezidentlik saylovlari 2020-yil 9-avgust kuni bo‘lib o‘tgan. Lukashenko 80,10 foiz ovoz bilan g‘alaba qozondi, Svetlana Tixanovskaya 10,12 foiz ovoz bilan ikkinchi o‘rinni egalladi. Rasmiy natijalar e’lon qilingach, mamlakatda bir necha oy davom etgan ommaviy norozilik namoyishlari boshlandi. Oqibatda ko‘plab muxolifat yetakchilari hibsga olindi yoki mamlakatni tark etdi.
Dmitriyev avvalgi safar 2022-yilning avgustida hibsga olingan, biroq keyinroq qo‘yib yuborilgan edi.
Izoh (0)