Valeriy Meladze “Ukrainaga shon-sharaflar bo‘lsin” degan iboraga javob berayotgani aks etgan video tufayli, uni Checheniston xalq artisti unvonidan mahrum qilishmoqchi emas. Bu haqda respublika Madaniyat vazirligi ma’lum qildi.
“Checheniston Respublikasi Rossiya yaxlitligini yoqlab, xalqaro terrorizmga qarshi chiqadi, barqarorlikni, mamlakat rahbariyati siyosatini yoqlaydi, hozircha esa bularga u (Meladze) tomonidan til tekkizilgani yo‘q. Checheniston Respublikasi Ukraina hududida konstitutsiyaviy tartib o‘rnatilishida faol ishtirok etmoqda. Barchamiz urushga qarshi chiqamiz, hamma tinchlik va ahillikda yashashini istaymiz. Uni ‘Xalq artisti’ unvonidan mahrum qilish masalasi ko‘tarilganicha yo‘q”, — deyishdi idorada.
Ijtimoiy tarmoqlarda tarqalgan videoda Dubaydagi korporativ kechada Meladzening muxlisi unga “Ukrainaga shon-sharaf!” deya murojaat qilgan. Bunga javoban Meladze mikrofonni og‘zidan olib, “Qahramonlarga shon-sharaf” deya javob qaytargan va ko‘zini qisib qo‘ygan. Xonanda korporativ kechasi “siyosatdan tashqarida” ekanini aytib o‘tgan.
Rossiya rasmiylari esa Meladzening Ukrainaning qo‘llab-quvvatlab aytgan shiorini tanqid qilib, uni Rossiya fuqaroligidan mahrum qilishga va xorijiy agent deb e’lon qilishga chaqirgan.
Meladzening o‘zi esa 3-yanvar kuni Instagram sahifasida tanqidlarga munosabat bildirgan.
“Odamlar, meni eshitishingizni va so‘zlarimni tushunishingizni xohlayman. Mana 10 oydirki, men ham boshqa odamlar kabi qayg‘u hissi bilan yashayapman. Men juda yaxshi ko‘rgan xalqlar to‘qnashuvda bo‘lib, odamlar halok bo‘lmoqda. Hech kimdan nafratlanishni xohlamayman va kimnidir rozi qilishga ham harakat qilmayman. Men faqat qarama-qarshilik to‘xtab, yaqin xalqlar o‘rtasida totuvlik o‘rnatilishini orzu qilaman. Buning uchun esa bor kuchimni berishga tayyorman”, — deydi Meladze.
Meladze Batumida tug‘ilgan va bir necha yillar davomida Ukrainada yashab, ta’lim olgan. Checheniston xalq artisti unvonini 2008-yilda qo‘lga kiritgan. Xonanda — Rossiyada xizmat ko‘rsatgan artist.
O‘tgan yil fevralida Meladze Ukrainadagi jangovar harakatlarga qarshi chiqqan ilk san’atkorlardan biriga aylandi. “Sizdan harbiy harakatlarni to‘xtatib, muzokaralar olib borishni so‘rayman, yalinaman… Odamlar halok bo‘lmasligi kerak, buni to‘xtatish kerak”, — degan edi u Rossiya maxsus operatsiyasi boshlangan kuni.
Izoh (0)