Berdimuhamedov yana Konstitutsiyani o‘zgartirib, bir palatali parlamentni qaytarmoqchi

Turkmaniston sobiq prezidenti Gurbanguli Berdimuhamedov mamlakat konstitutsiyasiga o‘zgartirishlar kiritib, Xalq Maslahatiga katta vakolatlar berish niyati haqida ma’lum qildi. Bu haqda “Xroniki Turkmenistana” xabar bermoqda.

Turkmaniston Xalq Maslahati raisi Gurbanguli Berdimuhamedov yana bir marta Konstitutsiyani o‘zgartirish, bir palatali parlament — Majlisni qaytarish, Xalq Maslahatini esa yana oliy vakillik organiga aylantirishni (2020-yilgi o‘zgarishlargacha shunday bo‘lgan) taklif qildi.

Bu taklifni katta Berdimuhamedov 11-yanvar kuni Milliy Kengash (parlament)ning ikkala palatasi a’zolari qo‘shma majlisida o‘rtaga tashladi va buni “qonunchilik organini zamonning real so‘rovlari asosida takomillashtirish” zaruriyati bilan izohladi.

Xalq Maslahati tarkibiga Gurbanguli Berdimuhamedov, uning o‘g‘li Serdar, Majlis rahbari, Oliy sud raisi, Bosh prokuror va boshqalar kiradi.

Xalq Maslahati Turkmaniston Konstitutsiyasiga o‘zgartirishlarni ma’qullashi, ichki va tashqi siyosat yo‘nalishlarini ma’qullab berishi, mamlakatni rivojlantirish dasturlarini tasdiqlashi, xavfsizlik va tinchlik masalalarini ko‘rib chiqishi mumkin bo‘ladi.

Ta’kidlanishicha, Xalq Maslahati birinchi marta 1992-yilda tashkil qilingan va Turkmanistonda oliy vakillik organi hisoblangan.

2008-yilda hokimiyat tepasiga Gurbanguli Berdimuhamedov kelganidan keyin organ Oqsoqollar kengashiga aylantirilgan va barcha qonunchilik vakolatlaridan mahrum qilingan.

Oradan o‘n yil o‘tib, 2018-yilda organ yana Xalq Maslahati deb qayta nomlangan. Kengash majlislarida uning vakillari mamlakatda elektr toki, gaz va suvdan foydalanish uchun bepul limitning bekor qilinishini ma’qulladi, keyinroq esa Konstitutsiyaga o‘zgartirishlar kiritish va parlamentni ikki palatali qilishni yoqlab ovoz berdi.

Shundan keyin parlamentning quyi palatasi Majlis (ungacha Majlis — bir palatali parlamentning umumiy nomi bo‘lgan), yuqori platasi esa Xalq Maslahati (hozir uning raisi Gurbanguli Berdimuhamedov hisoblanadi) deb atala boshladi.

Xalq Maslahati endi parlament palatasini anglatgani uchun, xalq vakillik organi 2022-yilda Davlat maslahati deb qayta nomlandi.