“Tolibon” Afg‘onistonning birinchi milliy superkarini namoyish qildi (video)

“Tolibon” harakati Afg‘onistonning Mada 9 nomli birinchi superkarini namoyish qildi. Bu haqda The Telegraph xabar berdi.

Mashina ishlab chiqarilishi 5 yil davom etgan, kapot ostiga Toyota Corolla dvigateli o‘rnatilgan. Superkar prototipi ENTOP va Afg‘onistonning Kobul kasb-hunar institutining 30 nafar muhandisi tomonidan ishlab chiqilgan. Superkarning dinamik xususiyatlari haqidagi ma’lumotlar ochiqlanmagan.

“Tolibon” matbuot kotibi Zabihulloh Mujohid superkar yaratish butun Afg‘oniston uchun “sharaf” ekanini aytdi. Mada 9 taqdimotida superkar harakatsiz turgan. Uning ichki qismi sezilarli yaxshilanishlarni talab qiladi. Avtomobil yaratuvchilari Toyota Corolla dvigateli o‘zgartirilganini ta’kidladi. Biroq, Mada 9 ning yakuniy versiyasi elektr harakatlantiruvchi tizimga ega bo‘lishi kerak.

ENTOP bosh direktori Muhammad Rizo Ahmadi superkar Afg‘onistonning jahon miqyosidagi obro‘sini oshirishga yordam beradi degan umidda. Uning qo‘shimcha qilishicha, tayyor superkar avval Afg‘onistonda, keyin esa boshqa mamlakatlarda sotiladi.