Isroil armiyasi bosib olingan Sharqiy Quddusdagi qochqinlar lageriga reyd chog‘ida uyi tomida turgan falastinlik erkakni o‘ldirdi. Bu haqda Al Jazeera xabar berdi.
Marhum 41 yoshli Samir Aslan bo‘lib, tong saharda qochqinlar lagerida ko‘kragidan otib o‘ldirilgan. Rasmiylarning Al Jazeera’ga ma’lum qilishicha, sakkiz farzandning otasi bo‘lgan Aslan boshqa oila a’zolari bilan uyining tomida bosqinni tomosha qilayotgan paytda isroillik snayper tomonidan otib tashlangan.
U 17 yoshli o‘g‘li Ramzi Isroil armiyasi tomonidan uyidan hibsga olinganidan taxminan 10 daqiqa o‘tib o‘ldirilgan. Hibsga olingandan so‘ng, “butun oila baland ovozda qichqiriqni eshitib, nima bo‘layotganini ko‘rish uchun tomga chiqqan. Samir, uning rafiqasi, uchta qizi va bir nechta o‘g‘illari uyda bo‘lganida isroillik snayper oilaga qarata o‘q uzgan va Samirni to‘g‘ridan to‘g‘ri ko‘kragiga otgan”, — deydi lagerni boshqaradigan Falastin ma’muriyati rasmiysi Zakariya Fayyaleh.
O‘g‘illari uni ko‘tarib, kasalxonaga olib bormoqchi bo‘lgan. Biroq Isroil kuchlari ularni to‘xtatib, Samirni yerga qo‘ydirgan. U bir muddat, Isroil kuchlari ketgunicha qonga belangan holda yotgan. Kasalxonaga yetib borgach, olamdan o‘tgan.
Aholi va mahalliy ommaviy axborot vositalari tomonidan tarqatilgan, Al Jazeera tomonidan tasdiqlangan videolarda Aslan isroillik askarlar qurshovida yerda yotganini ko‘rish mumkin.
“Samir mening eng yaqin do‘stlarimdan biri edi, u bilan birodarlik munosabatida bo‘lganman”, — dedi Fayyaleh va Aslanning al-Ram shahridagi qassob do‘konida ishlaganini qo‘shimcha qildi.
U Isroil armiyasining Qalandiya qochqinlar lageriga reyd uyushtirgani misli ko‘rilmagan bo‘lib, buni “agressiv va shiddatli hujum” deb ta’riflagan.
“Ular kuchlar soni, bostirib kirgan uylar soni bo‘yicha birinchi marta lagerga shunday reyd uyushtirishmoqda. Odamlarning narsalarini vayron qilib, hatto ayollarga hujum qilishgan”, — deya davom etdi u va snayperlar tomlarga joylashtirilganini aytdi.
Mavzuga doir:
Izoh (0)