Peruda yangi prezident Dina Boluarte, bosh vazir Alberto Otarola, ichki ishlar vazirlari Viktor Roxas va mudofaa vaziri Xorxe Chavesga nisbatan tergov boshlandi, deb xabar bermoqda “RBK” mamlakat Bosh prokuraturasiga tayanib.
“2022-yil dekabr va 2023-yil yanvar oylarida bo‘lib o‘tgan namoyishlar chog‘ida genotsid, qotillik va og‘ir tan jarohati yetkazish jinoyatlari bo‘yicha dastlabki tergov harakatlari davom ettirilmoqda”, — deyiladi xabarda.
Bosh prokuratura shuningdek, tergov boshlanishiga mamlakat janubi-sharqidagi Puno shahrida namoyishchilar va huquq-tartibot idoralari o‘rtasidagi to‘qnashuvda 18 kishi qurbon bo‘lganini ma’lum qildi. U yerda miting ishtirokchilari Boluartening iste’foga chiqishi, yangi saylovlar o‘tkazilishini talab qilgan, deb yozadi La Republica. Nashrning qayd etishicha, mitinglar qurbonlarining umumiy soni 40 nafarga yaqinlashgan.
Bosh prokuratura ushbu masala bo‘yicha tergov harakatlari olib borilayotganini ta’kidladi – ular videokuzatuv kameralari tasvirlari, guvohlarning ko‘rsatmalarini yig‘moqda; sud-tibbiyot shifokorlari murdalarni yorib ko‘rmoqda.
Perudagi norozilik namoyishlari dekabr oyining birinchi yarmida, o‘sha paytdagi prezident Pedro Kastilyo uni korrupsiya ayblovlari tufayli ishdan bo‘shatmoqchi bo‘lgan parlament yig‘ilishi oldidan Kongressni tarqatib yuborgani va favqulodda holat e’lon qilganidan keyin boshlangan. Shunga qaramay, deputatlar davlat rahbariga impichment e’lon qilishdi. Keyinchalik Kastilyo isyonda ayblanib, hibsga olingan va 18 oyga qamalgan.
Davlat rahbari lavozimini vitse-prezident Dina Boluarte egalladi. U 2024-yilda muddatidan oldin saylovlar o‘tkazish hamda konstitutsiyaviy islohotlarni taklif qildi. Ammo uni hamma ham qo‘llab-quvvatlamadi.
Izoh (0)