Afg‘onistonda “Tolibon” harakati ayollarning sport zallari va bog‘larga borishini taqiqlab qo‘ygan, bu esa xalqaro hamjamiyatning qoralanishiga sabab bo‘lmoqda. Ammo mamlakat bo‘ylab ayollar qoidalarni chetlab o‘tib, maktablardan tortib go‘zallik saloni va sport zallarigacha yashirin biznes ochmoqda.
Kobul va boshqa bir qancha yirik shaharlardagi xususiy uylarning yerto‘lalarida ayollar uchun sport zallari tashkil etilgan. Derazalar qoraytirilgan, musiqa eshitilmaydi, mehmonlar faqat orqa eshikdan kirishi mumkin.
“Bu sport zallarini ayollar boshqaradi, ularning ba’zilari ‘Tolibon’ hokimiyat tepasiga kelganidan keyin ishsiz qolgan”, deyiladi xabarda.
“Ayollar endi restoran, madaniy tadbir, hattoki bog‘da yolg‘iz yura olmaydi, shu bois yer ostidagi bu sport zallari biz uchun umid chirog‘idir,” — deydi fitnes o‘qituvchisi Laylo Ahmad.
Ahmadning mijozlari orasida BMTning sobiq xodimlari, davlat xizmatchilari, o‘qituvchi, politsiyachi, jurnalist va tadbirkor ayollar bor.
“Bu ularni o‘tmishi bilan bog‘lab, o‘zlarini tirik his qilishi mumkin bo‘lgan yagona joydir. Sport zaliga kelish terapiyaga o‘xshaydi. Garchi biz musiqani yoqa olmasak-da, baribir raqsga tushamiz, lekin hozir quloqchin ishlatamiz”, — deya qo‘shimcha qildi u.
Qayd etilishicha, ayollar sport zaliga borishni oilalaridan yashiradi, chunki ular mamlakatdagi dahshatli iqtisodiy inqiroz sharoitida buni pulni behuda sarflash deb biladi. Ba’zilar esa ayollar sport zali, sport kiyimi va estrada musiqasini “axloqsiz G‘arb importi” deb hisoblaydi.
“Tolibon” ayollarning universitet va o‘rta maktabda ta’lim olishini taqiqladi. Afg‘onistonda ayollarning shifoxonaga yolg‘iz borishi ham mumkin emas. Bundan tashqari ayollarga SIM karta sotib olish taqiqlangan.
Izoh (0)